Rövşən Binnətli sağalıb
Tanınmış jurnalist, “İdman” Televiziyasının direktor əvəzi Rövşən Binnətli iyulun 18-i Bakıdakı “Yeni klinika”da müalicəsini başa vuraraq evə buraxılıb. Koronavirus infeksiyasına yoluxan jurnalist iyulun 5-də xəstəxanaya yerləşdirilmişdi.
Novator.az-a açıqlamasında jurnalist özünü yaxşı hiss etdiyini, həkimlərə və tibb işçilərinə minnətdar olduğunu deyib.
Rövşən Binnətli 1958-ci ildə Ağdamın Mirəşelli kəndində doğulub. Bakı Dövlət Universitetinin jurnalistika fakültəsini bitirib. Uzun illər Ağdam Rayon Komsomol Komitəsində məsul vəzifələrdə çalışıb.
Qarabağ müharibəsi veteranıdır.
2000-ci ildən “Lider” Televiziyasında şərhçilər qrupunun rəhbəri, televiziyanın baş idman şərhçisi olub.
2012-ci ildən “Baku Post” qəzetində şöbə müdiri, ardınca qəzetin Azərbaycan dili bölməsinin redaktoru işləyib.
2015-ci ildən “CBC Sport” telekanalının informasiya xidmətinin şef redaktoru olub, 2019-cu ildən “İdman TV”də direktor müavini vəzifəsini tutur, hazırda direktorun səlahiyyətlərini həyata keçirir.
