Bazarın nəbzi
2020-ci ilin yanvar-iyun aylarında Azərbaycanda istehlak ötən ilin ilk yarısına nisbətən 3 faiz bahalaşıb. Novator.az-ın məlumatına görə, bu barədə hesabat yayan Dövlət Statistika Komitəsi bildirir ki, ərzaq məhsulları, içkilər və tütün məmulatları üzrə 5,5 faiz, qeyri-ərzaq məhsulları üzrə 1,3 faiz, əhaliyə göstərilmiş ödənişli xidmətlər üzrə 1 faiz inflyasiya gedib.
Başqa bir rəsmi hesabata əsasən, yanvar-iyun aylarında pərakəndə ticarət dövriyyəsi real ifadədə 1,9 faiz, o cümlədən qeyri-ərzaq malları üzrə 6,9 faiz azalıb, ərzaq məhsulları, içkilər və tütün məmulatları üzrə 3,1 faiz artıb.
Yarım ildə alıcıların son istehlak məqsədilə aldıqları mallara xərclədiyi vəsaitin 48 faizinin ərzaq məhsullarının, 5,3 faizinin içkilər və tütün məmulatlarının alınmasına sərf olunduğu qeyd edilir: “Ticarət şəbəkəsində bir ölkə sakini orta hesabla ayda 162,8 manatlıq ərzaq məhsulları, içkilər və tütün məmulatları, 142,5 manatlıq qeyri-ərzaq malları alıb”.
Yanvar-may aylarında xarici ticarət dövriyyəsinin faktiki qiymətlərlə 30,1 faiz, real ifadədə 19 faiz, o cümlədən idxalın 42,7 faiz, ixracın 2,2 faiz azaldığı bildirilir.
Rəsmi açıqlamaya görə, yanvar-may aylarında qeyri neft-qaz məhsullarının ixracı 2019-cu ilin yanvar-may aylarına nisbətən faktiki qiymətlərlə 8,9 faiz, real ifadədə isə 14,5 faiz azalaraq 721,5 milyon dollar təşkil edib.
