Səid Dadaşbəyli işi: içəridə bir nəfər qaldı
2007-ci ildən bəri həbsdə olan Səid Dadaşbəyli iyulun 15-də azadlığa çıxıb. Novator.az bildirir ki, o, Siyasi Məhbusların Vahid Siyahısı üzrə İşçi Qrupun (Akif Qurbanov, Ənnağı Hacıbəyli, Xalid Ağalıyev, Xədicə İsmayıl, İntiqam Əliyev, Rövşən Hacıbəyli, Samir Kazımlı, Yalçın İmanov və başqaları) siyasi məhbus saydığı şəxslərdən biri idi.
Səid Dadaşbəyli Azərbaycan Dövlət İqtisad Universitetində ali təhsil alıb. Azərbaycan Dövlət Neft Şirkətində və “Azəri EM-AY Drillinq Flyuids” Azərbaycan-ABŞ birgə müəssisəsində çalışıb.
Milli Təhlükəsizlik Nazirliyinin (indiki Dövlət Təhlükəsizliyi Xidməti) 2007-ci ildə tutduğu Səid Dadaşbəyli və başqaları “NİMA” (Mehdi Seyid əz-Zamanın Şimal Ordusu) adlı radikal dini qruplaşma yaradaraq İranın xüsusi xidmət orqanlarına casusluq etməklə dövlət əleyhinə cinayətlərin törədilməsində ittiham olunublar. Onlardan biri – Emin Məmmədov 2007-ci ilin mart ayında ölüb.
Bakı Ağır Cinayətlər Məhkəməsinin 10 dekabr 2007-ci il hökmü ilə Səid Dadaşbəyli 14 il müddətinə azadlıqdan məhrum edilib. Bakı Apellyasiya Məhkəməsi və Ali Məhkəmə hökmü qüvvədə saxlayıb. 2016-cı ildə onun cəzası 13 il 6 aya endirilib.
İş üzrə məhkum olunanların 7-si 2019-2020-ci illərdə azadlığa çıxıblar. İyulun 15-də Səid Dadaşbəyli ilə yanaşı daha bir nəfər cəza müddətini başa vurub.
Hazırda Səid Dadaşbəyli qrupundan yalnız Ceyhun Əliyev həbsdədir. 15 yanvar 2007-ci ildə tutulan Ceyhun Əliyev 14 il müddətinə azadlıqdan məhrum edilib.
