Nazir müavini səlahiyyətləri kimə keçib?
Müdafiə nazirinin maddi-texniki təminat üzrə müavini-Maddi-Texniki Təminat Baş İdarəsinin rəisi vəzifəsinin icrası general-leytenant Osmanov Nizam Ramazan oğluna həvalə olunub.
Novator.az bildirir ki, Nizam Osmanov 16 iyun 1965-ci ildə Ermənistanda doğulub. 1986-cı ildə Bakı Ali Ümumqoşun Komandirlər Məktəbini bitirib.
1986-1992-ci illərdə Uzaq Şərq Hərbi Dairəsində vzvod, rota, batalyon komandiri vəzifələrində xidmət edib.
Azərbaycan Silahlı Qüvvələrində 1992-ci ilin avqust ayından xidmətə başlayıb. 1992-2002-ci illərdə tabor komandiri, hərbi hissənin əməliyyat şöbəsi rəisinin baş köməkçisi, qərargah rəisi, alay komandirinin müavini, briqadanın qərargah rəisi və komandiri, hərbi birlik komandirinin müavini vəzifələrini tutub.
2002-2014-cü illərdə hərbi birlik komandiri olub.
2014-2020-ci illərdə Silahlı Qüvvələrin Baş Qərargah rəisinin müavini-Döyüş Hazırlığı və Hərbi Təhsil Baş İdarəsinin rəisi vəzifəsində xidmət keçib.
Qarabağ müharibəsi iştirakçısı, “Azərbaycan Bayrağı” ordeni, 3-cü dərəcəli “Vətənə xidmətə görə” ordeni, “Vətən uğrunda” medalı, “İgidliyə görə” medalı, “Azərbaycan Xalq Cümhuriyyətinin 100 illiyi (1918-2018)” yubiley medalı ilə təltif olunub.
8 iyul 2020-ci ildə müdafiə nazirinin əmri ilə nazirin maddi-texniki təminat üzrə müavini-Maddi-Texniki Təminat Baş İdarəsinin rəisi vəzifəsinin icrasına buraxılıb.
Prezident, Silahlı Qüvvələrin ali baş komandanı İlham Əliyev general-leytenant Fuad Məmmədovu müdafiə nazirinin maddi-texniki təminat üzrə müavini-Maddi-Texniki Təminat Baş İdarəsinin rəisi vəzifəsindən bu yaxınlarda azad edib.
1968-ci il təvəllüdlü Fuad Nadir oğlu Məmmədov 25 iyun 2018-ci ildən müdafiə nazirinin maddi-texniki təminat üzrə müavini-Maddi-Texniki Təminat Baş İdarəsinin rəisi olub.
