Prezident yenə prezident oldu
Polşada prezident seçkisi başa çatıb. Novator.az-ın məlumatına görə, iyulun 12-də keçirilmiş ikinci turda dövlət başçısı Anjey Duda səslərin 51,2%-ni toplayaraq postunu qoruyub.
11 iddiaçının yarışdığı ilk turda – iyunun 28-də Anjey Duda (43,5%) ilə müxalif Vətəndaş Platforması Partiyasının namizədi, paytaxt Varşavanın meri Rafal Tşaskovski (30,4%) önə çıxmış, ikinci tura qərar verilmişdi.
Dövlət Seçki Komissiyasının ilkin hesabatına əsasən, Rafal Tşaskovski ikinci turda 48,8% səs yığıb.
Anjey Duda 1972-ci ildə doğulub. Krakovdakı Yaqellon Universitetinin hüquq və administrasiya fakültəsini bitirib. 1997-2006-ci illərdə həmin təhsil ocağında dərs deyib. Hüquq doktorudur.
Ədliyyə Nazirliyində, Prezident Dəftərxanasında məsul vəzifələr tutub, Polşa parlamentinin aşağı palatasının və Avropa Parlamentinin üzvü olub.
2015-ci il mayın 24-də Hüquq və Ədalət Partiyasının namizədi kimi ölkə prezidenti seçilib, avqustun 6-da səlahiyyətlərinin icrasına başlayıb.
Parlamentin 460 yerlik aşağı palatasında – Seymdə mandatların yarıdan çoxuna sahib Hüquq və Ədalət Partiyasına Yaroslav Kaçinski rəhbərlik edir. 1949-cu il təvəllüdlü Yaroslav Kaçinski 2006-2007-ci illərdə Polşanın baş naziri olub.
