Milli komandaya kim gəldi?
Azərbaycan Futbol Federasiyaları Assosiasiyasının İcraiyyə Komitəsi 10 iyul iclasında italyan mütəxəssis Canni De Byazinin milli komandanın baş məşqçisi vəzifəsinə təyin olunmasına razılıq verib.
Novator.az bildirir ki, 1956-cı il təvəllüdlü Canni De Byazi futbolçu karyerası ərzində ölkəsində bir çox klubun, o cümlədən “İnter”, “Peskara”, “Breşia”, “Palermo”, “Viçensa” komandalarının yarımmüdafiəçi olub.
Məşqçi kimi Canni De Byazi bir çox komandada, o cümlədən İtaliyanın “Karpi”, SPAL, “Modena”, “Breşia”, “Torino”, “Udineze”, İspaniyanın “Levante”, “Alaves” klublarında çalışıb, Albaniya milli komandasına baş məşqçilik edib.
Azərbaycan milli komandasının sükanı arxasında 1992-1993-cü illərdə Ələkbər Məmmədov, 1994-1995-ci illərdə Ağasəlim Mircavadov, 1995-1996-cı illərdə Kazbek Tuayev, 1997-1999-cu illərdə Vaqif Sadıqov, 1999-2000-ci illərdə Əhməd Ələsgərov, 2000-2001-ci illərdə İqor Ponomaryov, 2002-2004-cü illərdə Əsgər Abdullayev, 2004-2005-ci illərdə Karlos Alberto Torres, 2005-2007-ci illərdə Şahin Diniyev, 2008-2014-cü illərdə Berti Foqts, 2014-2017-ci illərdə Robert Prosineçki, 2017-2018-ci illərdə Qurban Qurbanov, 2019-cu ildə Nikola Yurçeviç dayanıb.
