Müdafiə nazirinin müavini başqa işə keçirilib
Prezident, Silahlı Qüvvələrin ali baş komandanı İlham Əliyev sərəncam imzalayaraq general-leytenant Fuad Məmmədovu müdafiə nazirinin maddi-texniki təminat üzrə müavini-Maddi-Texniki Təminat Baş İdarəsinin rəisi vəzifəsindən azad edib. Xəbəri Müdafiə Nazirliyinə istinadla Report.az yayıb.
Fuad Məmmədova müdafiə nazirinin əmri ilə nazirlikdə başqa vəzifə verildiyi, general-leytenant Nizam Osmanova müdafiə nazirinin maddi-texniki təminat üzrə müavini-Maddi-Texniki Təminat Baş İdarəsinin rəisi vəzifələrinin müvəqqəti icrasının həvalə olunduğu vurğulanır.
Novator.az bildirir ki, Fuad Nadir oğlu Məmmədov 31 yanvar 1968-ci ildə Bakı şəhərində doğulub.
1985-ci ildə Bakıda Cəmşid Naxçıvanski adına Hərbi Liseyi, 1990-cı ildə Riqada Ali Hərbi Aviasiya Mühəndislər Məktəbini bitirib.
Qarabağ müharibəsi veteranıdır. 1992-ci ildən Azərbaycan Hərbi Hava Qüvvələrində qrup rəhbəri, eskadrilya komandirinin müavini, baş mühəndis, Hərbi Hava Qüvvələri komandanının müavini vəzifələrində xidmət edib.
2015-ci ildən Maddi-Texniki Təminat Baş İdarəsi rəisinin müavini-Qərargah rəisi postunu tutub, 25 iyun 2018-ci ildə müdafiə nazirinin maddi-texniki təminat üzrə müavini-Maddi-Texniki Təminat Baş İdarəsinin rəisi təyin olunub.
