Açılış
Prezident İlham Əliyev iyulun 9-u Bakının Nizami rayonunda “Azərenerji” Açıq Səhmdar Cəmiyyətinin yenidən qurulan 110/35/10 kilovoltluq “8-ci km” yarımstansiyasının açılışında iştirak edib.
Xəbəri AZƏRTAC yayıb.
Arayışa görə, 52 il əvvəl tikilmiş, istismar müddətini çoxdan başa vurmuş “8-ci km” yarımstansiyasında tez-tez qısa qapanmalar olub və enerji sistemi qəza təhlükəsi ilə üzləşib. Yenidənqurma nəticəsində bu problemlərin hamısı aradan qaldırılıb, yarımstansiyanın açıq və qapalı paylayıcı qurğuları, transformatorları, inzibati idarəetmə binası və digər zəruri infrastrukturu müasir səviyyədə yenilənib.
Yarımstansiyanın Xətai və Nizami rayonlarında yüz minlərlə əhalinin, sənaye, məişət-kommunal, təhsil, tibb və iaşə müəssisələrinin elektrik enerjisi ilə fasiləsiz təmin edilməsində mühüm rol oynayacağı bildirilir.
