“525-ci qəzet”in yeni iş rejimi bəlli oldu
Gündəlik rejimə qayıdan “525-ci qəzet” həftədə beş dəfə A:3 (kiçik) formatda çıxır. Redaksiyadan Novator.az-a verilən məlumata görə, qəzet çərşənbə axşamı, cümə axşamı və cümə günləri 16 səhifədə, çərşənbə və şənbə günləri 24 səhifədə işıq üzü görür.
1992-ci ildə həftəlik nəşr kimi yaradılan “525-ci qəzet” sonralar dövriliyini artırıb, 1999-cu ildən isə həftədə beş dəfəyə keçib.
2019-cu ilin aprelindən Kütləvi İnformasiya Vasitələrinin İnkişafına Dövlət Dəstəyi Fondu “525-ci qəzet”i günaşırı nəşrlərə aid etmiş, həmin vaxtdan qəzet həftədə üç dəfə ilə kifayətlənməli olmuşdu.
Bu il iyulun 4-də Kütləvi İnformasiya Vasitələrinin İnkişafına Dövlət Dəstəyi Fondu qəzet redaksiyalarına maliyyə yardımının göstərilməsi üzrə müsabiqənin nəticələrini açıqlayıb. Üç sahə üzrə qalib elan olunan qəzetlər gündəlik (həftədə beş dəfə) nəşr olunmalıdır. Onlardan biri “525-ci qəzet”dir.
Digər gündəlik nəşrlər bunlardır: “Bakı xəbər”, “Səs”, “Şərq”, “Yeni Azərbaycan”, “Yeni Müsavat”.
