Nazirlər Kabineti yanında operativ qərargahın iyulun 4-də yaydığı məlumata görə, Azərbaycanda daha 534 nəfər koronavirus infeksiyasına yoluxub, 471 nəfər sağalaraq xəstəxanadan buraxılıb, 6 xəstə vəfat edib.

2019-cu ilin dekabrında Çində üzə çıxaraq 215 ölkə, ərazi və məkana yayılan koronavirus xəstəliyinə Azərbaycanda ilk yoluxma fevralın 28-də qeydə alınıb. Rəsmi hesabata görə, ölkədə ümumən 19 min 801 nəfərin koronavirusa yoluxması müəyyən edilib, onların 11 min 291-i müalicə olunaraq sağalıb, 241-i dünyasını dəyişib, 8269-u aktiv xəstədir.

Azərbaycanda xüsusi karantin rejimi tətbiq olunur. İyunun 21-dən Bakı, Cəlilabad, Gəncə, Lənkəran, Masallı, Sumqayıt, Yevlax şəhərlərində və Abşeron rayonunda evdən çıxmaq icazə sisteminə bağlanıb.

İyulun 5-dən həmin rejim Goranboy, Göygöl və Mingəçevir şəhərləri, Bərdə, Xaçmaz, Samux, Siyəzən və Şəki rayonlarını da əhatə edəcək.