Sultan 80-i haqladı
Siyasətçi, dövlət xadimi Nursultan Nazarbayevin 80 yaşı tamam olur.
Novator.az bildirir ki, 1940-cı il iyulun 6-da Qazaxıstanın Almatı vilayətində doğulan Nursultan Nazarbayev Karaqanda Dövlət Sənaye Universitetini bitirib. Uzun illər metallurgiya sahəsində, komsomol və partiya orqanlarında məsul postlarda çalışıb.
1979-cu ildən Nursultan Nazarbayev ali dövlət vəzifələri tutub, Qazaxıstan Kommunist Partiyası Mərkəzi Komitəsinin katibi, Nazirlər Sovetinin sədri olub.
1989-cu il iyunun 22-də Qazaxıstan Kommunist Partiyası Mərkəzi Komitəsinin birinci katibi – respublika rəhbəri seçilib. 1990-cı ildən eyni zamanda Qazaxıstan Ali Sovetinin sədri postunu tutub.
1990-cı ildə parlamentdə prezident seçilib.
1991-ci il dekabrın 16-da Qazaxıstan dövlət müstəqilliyini elan edib.
Nursultan Nazarbayev 1991, 1999, 2005, 2011, 2015-ci illərin ümumxalq səsvermələrində prezident kürsüsünü qoruyub.
2019-cu il martın 20-də dövlət başçısı postundan öz istəyi ilə ayrılan Nursultan Nazarbayev Təhlükəsizlik Şurasının sədri, Konstitusiya Şurasının üzvü, hakim Nur Otan Partiyasının lideridir.
2017-ci il aprelin 3-də Azərbaycan prezidenti İlham Əliyevin sərəncamı ilə “Heydər Əliyev” ordeni ilə təltif olunub.
Nursultan Nazarbayev hakimiyyətdən gedən gün – 2019-cu il martın 20-də parlamentin yuxarı palatasının 1953-cü il təvəllüdlü sədri Qasım-Comərd Tokayev Qazaxıstanın ikinci prezidenti elan edilib. Həmin il iyunun 9-da keçirilən prezident seçkisi Qasım-Comərd Tokayevin qələbəsi ilə başa çatıb. O, Nur Otan Partiyasının namizədi olub.
Qasım-Comərd Tokayevin hakimiyyəti dövründə ölkənin paytaxtı Astananın adı dəyişdirilərək Nur-Sultan qoyulub.
