İlkin Rüstəmzadə “Nida”nı tərk etdi
Gənc fəal İlkin Rüstəmzadə “Nida” Vətəndaş Hərəkatının İdarə Heyətindən və hərəkat üzvlüyündən istefa verib.
Novator.az-ın məlumatına görə, İlkin Rüstəmzadə bunu “Facebook”dakı səhifəsində qısaca olaraq belə izah edib: “Son aylarda yaşadıqlarım və yaşatdıqlarım elə bir dərəcəyə gəlib çatıb ki, özümü psixoloji cəhətdən tam düzəltməmiş kiməsə faydam olacağını düşünmürəm”.
“Son aylarda yaşadıqlarım və yaşatdıqlarım” deyəndə İlkin Rüstəmzadə özünə və onun ictimai-siyasi fəaliyyətinə görə yenicə ailə qurduğu xanıma qarşı yönəlmiş mənəvi-psixoloji təzyiqləri, faktiki mənəvi terroru nəzərdə tutur.
Son zamanlar İlkin Rüstəmzadə dəfələrlə bildirib ki, hakimiyyət dairələri onu susdurmaq üçün həyat yoldaşını təhdid edir. İyunun 17-si gənc fəal həyat yoldaşının intihara cəhdini də bu təhdidlərin nəticəsi kimi qiymətləndirmişdi.
“Nida”nı tərk etdiyinə dair açıqlamasında İlkin Rüstəmzadə “Facebook” şəbəkəsindəki fəaliyyətini dondurduğunu da qeyd edib.
İlkin Rüstəmzadə hakimiyyəti tənqid etməsi ilə tanınır. 1992-ci il təvəllüdlü İlkin Rüstəmzadə 2013-cü ilin mayında həbs olunaraq kütləvi iğtişaşların təşkili, qrup halında xuliqanlıq və ictimai asayişin pozulmasının qarşısını alan hakimiyyət nümayəndəsinə müqavimət göstərməklə xuliqanlıqda təqsirli bilinib, 8 il müddətinə azadlıqdan məhrum edilib, 2019-cu il martın 16-da əfv olunub.
