Birgə komissiyaların əsasnaməsi
İyulun 1-də fərman imzalayan prezident İlham Əliyev xarici ölkələrlə əməkdaşlıq üzrə birgə komissiyaların Azərbaycan tərəfinin fəaliyyəti haqqında əsasnaməni təsdiqləyib. Novator.az bildirir ki, sənədə görə, komissiyaların Azərbaycan tərəfdən tərkibini prezident rəsmiləşdirir.
Komissiyaların Azərbaycan tərəfinin vəzifələri belə sıralanır:
– xarici dövlətlərlə ticarət-iqtisadi, elmi-texniki, humanitar və qarşılıqlı maraq doğuran digər sahələrdə ikitərəfli əməkdaşlığın genişləndirilməsinə dair təkliflər hazırlamaq və aidiyyəti üzrə təqdim etmək;
– ölkəyə xarici investisiyaların və müasir texnologiyaların cəlbi, habelə ixracın təşviqi məqsədilə qarşılıqlı faydalı layihələrin həyata keçirilməsi işlərini koordinasiya etmək;
– yerli sahibkarların xarici iqtisadi subyektlərlə uzunmüddətli və sıx əməkdaşlığını təşkil etmək, bu əsasda onların xarici bazarlara effektiv inteqrasiyasını təmin etmək;
– iclaslarda qəbul edilmiş qərarların, əldə olunmuş razılaşmaların və iclasların nəticələrinə dair imzalanmış sənədlərin Azərbaycan tərəfinə aid müddəalarının icrası üzərində effektiv nəzarət və monitorinq işlərini həyata keçirmək;
– ölkələr arasında qarşılıqlı maraq doğuran məsələləri müzakirə etmək və qaldırılan məsələlərin həlli üçün məsləhətləşmələr aparmaq;
– dövlət orqanlarının (qurumlarının) xarici subyektlərlə ikitərəfli əməkdaşlığı sahəsində məlumat mübadiləsi ilə bağlı işləri əlaqələndirmək;
– ölkənin sosial-iqtisadi inkişaf prioritetləri nəzərə alınmaqla qarşı tərəflə növbəti ildə görüləcək işlər barədə illik fəaliyyət planlarını hər il dekabr ayının 15-dən gec olmayaraq təsdiq üçün Nazirlər Kabinetinə təqdim etmək;
– illik fəaliyyəti barədə yekun hesabatı hər il yanvar ayı ərzində Nazirlər Kabinetinə təqdim etmək;
– prezident aktları ilə müəyyən edilən digər vəzifələri yerinə yetirmək.
Komissiyaların Azərbaycan tərəfinin fəaliyyətinə rəhbərliyi prezidentin təyin etdiyi həmsədr həyata keçirir.
