Neftsiz ixrac 8,9 faiz azalıb
İqtisadi İslahatların Təhlili və Kommunikasiya Mərkəzi yeni ixrac icmalı yayıb. Novator.az bildirir ki, rəsmi hesabata görə, 2020-ci ilin yanvar-may aylarında Azərbaycanın ixracı 6,9 milyard ABŞ dollarına bərabər olub.
Qeyri-neft sektoru üzrə ixrac 721 milyon ABŞ dolları dəyərində göstərilir, ötən ilin eyni dövrü ilə müqayisədə 8,9 faiz azalma qeydə alındığı vurğulanır.
Açıqlamaya əsasən, beş ayda Rusiyaya 271 milyon, Türkiyəyə 144,3 milyon, Gürcüstana 70,5 milyon, İsveçrəyə 71,5 milyon, Çinə 23,6 milyon ABŞ dolları dəyərində qeyri-neft sektoruna aid mal ixrac edilib.
Qeyri-neft sektoruna aid malların siyahısında pomidor birinci (123,1 milyon ABŞ dolları), sikkə kəsilməsində istifadə olunmayan, digər emal olunmamış formalarda qızıl ikinci (64,7 milyon ABŞ dolları), qabığı təmizlənmiş meşə fındığı üçüncü (51 milyon ABŞ dolları) yerdə qərar tutur.
İqtisadi İslahatların Təhlili və Kommunikasiya Mərkəzi 2016-cı ildə yaradılıb. Nizamnaməsinə görə, mərkəzin əsas missiyası təhlil və tədqiqatlar aparmaqla iqtisadi islahatların həyata keçirilməsi üçün təkliflər, habelə orta və uzun müddətli dövr üçün proqnozlar hazırlamaq, dövlət orqanlarını və qurumlarını həmin proqnozlarla təmin etməkdir.
Qurumun icraçı direktoru postunu Vüsal Qasımlı tutur.
Dövlət Gömrük Komitəsinin rəsmi hesabatında yanvar-may ayları üzrə xarici ticarət əməliyyatlarının həcmi 11,1 milyard dollar göstərilib, 6,9 milyard dollardan çox ixracın, 4,2 milyard dollara yaxın idxalın qeydə alındığı, ixracın 89,6 faizinin neft-qaz sektoruna aid olduğu bildirilib.
