Neft Fondu Müşahidə Şurasından xeyir-dua aldı
Dövlət Neft Fondunun (DNF) Müşahidə Şurası qurumun 2019-cu ildəki fəaliyyəti barədə illik hesabatı məqbul hesab edib. Rəsmi məlumata əsasən, Müşahidə Şurasının iclasında DNF-nin 2019-cu ildəki gəlirlərinin 19 milyard 30,6 milyon manat, xərclərinin 11 milyard 588,6 milyon manat olduğu vurğulanıb, büdcənin icrası təsdiq üçün prezidentə göndərilib.
DNF-nin Müşahidə Şurasına baş nazir Əli Əsədov sədrlik edir. Qurumun üzvləri sırasına Milli Məclis sədrinin müavini Adil Əliyev, prezidentin köməkçisi-Prezident Administrasiyasının iqtisadi siyasət və sənaye məsələləri şöbəsinin müdiri Natiq Əmirov, prezidentin köməkçisi-Prezident Administrasiyasının iqtisadi məsələlər və innovativ inkişaf siyasəti şöbəsinin müdiri Şahmar Mövsümov, iqtisadiyyat naziri Mikayıl Cabbarov, maliyyə naziri Samir Şərifov, Mərkəzi Bankın sədri Elman Rüstəmov daxildir.
1999-cu ildə yaradılmış fonda İsrafil Məmmədov icraçı direktorluq edir.
Rəsmi hesabata əsasən, 2020-ci ilin birinci rübünün sonuna DNF-nin aktivləri 41 milyard 349,5 milyon ABŞ dollarına bərabər olub.
