Nazirliyin tabeliyindəki qurumların statusu dəyişdi
Prezident İlham Əliyev 2019-cu il dekabrın 30-da Əmək və Əhalinin Sosial Müdafiəsi Nazirliyinin tabeliyində dörd publik hüquqi şəxsin yaradılmasına fərman vermişdi: Dövlət Məşğulluq Agentliyi; Dövlət Sosial Müdafiə Fondu; Dövlət Tibbi-Sosial Ekspertiza və Reabilitasiya Agentliyi; Sosial Xidmətlər Agentliyi.
İyunun 30-da yeni fərman imzalayan dövlət başçısı Dövlət Sosial Müdafiə Fondunun, Dövlət Məşğulluq Agentliyinin, Dövlət Tibbi-Sosial Ekspertiza və Reabilitasiya Agentliyinin, Sosial Xidmətlər Agentliyinin nizamnamələrini təsdiqləyib. Novator.az bildirir ki, sənədə əsasən, Dövlət Sosial Müdafiə Fondu, Dövlət Məşğulluq Agentliyi, Dövlət Tibbi-Sosial Ekspertiza və Reabilitasiya Agentliyi Əmək və Əhalinin Sosial Müdafiəsi Nazirliyi yanında Dövlət Sosial Müdafiə Fondunun, Dövlət Məşğulluq Xidmətinin, Dövlət Tibbi-Sosial Ekspertiza və Reabilitasiya Xidmətinin hüquqi varisləri sayılır, onların bütün hüquq və öhdəlikləri, habelə əmlakı publik hüquqi şəxslərə keçir.
Dövlət Sosial Müdafiə Fondunun sosial xidmət göstərilməsi ilə bağlı hüquq və öhdəlikləri, habelə tabeliyindəki sosial xidmət müəssisələri bütün əmlakı ilə birlikdə Sosial Xidmətlər Agentliyinə ötürülür.
Əhalinin Sosial Müdafiəsi Nazirliyi publik hüquqi şəxslərin strukturunu bir ay müddətində təsdiqləməlidir.
