Azərbaycan mətbuatının 145 yaşı qeyd olunacaq
İyunun 30-da sərəncam imzalayan prezident İlham Əliyev Azərbaycan milli mətbuatının 145 illik yubileyinin keçirilməsini tapşırıb. Sərəncamda qeyd olunur ki, 1875-ci il iyulun 22-də Həsən bəy Zərdabinin Azərbaycan dilində nəşr etdirməyə başladığı “Əkinçi” qəzeti Azərbaycan milli mətbuatının ilk nümunəsi kimi tarixə düşüb.
Dövlət başçısı Prezident Administrasiyasına koronavirus pandemiyası ilə əlaqədar tətbiq edilən xüsusi karantin rejiminin tələbləri və Nazirlər Kabineti yanında operativ qərargahın tövsiyələrini nəzərə almaqla Azərbaycan milli mətbuatının 145 illik yubileyinin geniş qeyd olunmasını həvalə edib.
Administrasiya jurnalist təşkilatlarının və redaksiyaların təklifləri əsasında Azərbaycan milli mətbuatının inkişafında xüsusi xidmətləri olan jurnalistlərin mükafatlandırılması haqqında təqdimatlar verməlidir.
1991-ci il iyulun 5-də 22 iyul – Azərbaycanın ilk milli qəzeti olan “Əkinçi” qəzetinin birinci nömrəsinin çapdan çıxdığı gün Azərbaycan Jurnalistikası Günü elan edilib. Fərmanı ölkənin ilk prezidenti Ayaz Mütəllibov imzalayıb.
