İlk tur prezidenti önə çıxardı
Polşada iyunun 28-də keçirilmiş prezident seçkisinin ilkin nəticələri açıqlanıb. Novator.az-ın məlumatına görə, 11 iddiaçının yarışdığı ilk turda dövlət başçısı Anjey Duda önə çıxıb. Dövlət Seçki Komissiyası onun 45,2% səs topladığını bəyan edib.
Rəsmi hesabata əsasən, müxalif Vətəndaş Platforması Partiyasının namizədi, paytaxt Varşavanın meri Rafal Tşaskovski ikinci tura 28,9% səslə adlayır.
İkinci tur iyulun 12-nə təyin olunub.
Anjey Duda 1972-ci ildə doğulub. Krakovdakı Yaqellon Universitetinin hüquq və administrasiya fakültəsini bitirib. 1997-2006-ci illərdə həmin təhsil ocağında dərs deyib. Hüquq doktorudur.
Ədliyyə Nazirliyində, Prezident Dəftərxanasında məsul vəzifələr tutub, Polşa parlamentinin aşağı palatasının və Avropa Parlamentinin üzvü olub.
2015-ci il mayın 24-də Hüquq və Ədalət Partiyasının namizədi kimi ölkə prezidenti seçilib, avqustun 6-da səlahiyyətlərinin icrasına başlayıb.
Parlamentin 460 yerlik aşağı palatasında – Seymdə mandatların yarıdan çoxuna sahib Hüquq və Ədalət Partiyasına Yaroslav Kaçinski rəhbərlik edir. 1949-cu il təvəllüdlü Yaroslav Kaçinski 2006-2007-ci illərdə Polşanın baş naziri olub.
