Dövlət başçısı kürsüsünü qorudu
Qudni Yohanesson yenidən İslandiya prezidenti seçilib. Novator.az-ın məlumatına görə, dövlət başçısı iyunun 27-də keçirilmiş prezident seçkisində 92,2% səs toplayıb. Onun rəqibi, sahibkar Qudmundur Franklin Yonssonu seçicilərin 7,8%-i dəstəkləyib.
1968-ci il təvəllüdlü Qudni Yohanesson Böyük Britaniyada tarix və politologiya üzrə (bakalavr), həmin ölkədə və İslandiyada tarix üzrə (magistr) ali təhsil alıb. Tarix elmləri doktorudur.
1988- 2001-ci illərdə jurnalist fəaliyyəti ilə məşğul olub, sonralar İsland Universitetində və Reykyavik Universitetində dərs deyib, elm ocaqlarında çalışıb.
Qudni Yohanesson 2016-cı il iyunun 26-da 39,1% səslə ölkə prezidenti seçilib, avqustun 1-də səlahiyyətlərinin icrasına başlayıb.
