Əmanətlərin Sığortalanması Fondu Mərkəzi Bankın İdarə Heyətinin qərarları ilə lisenziyaları ləğv edilən “AGBank”, “Atabank”, “Amrah Bank” və “NBCBank” bankları ilə bağlı yeni məlumat yayıb.
“Atabank” la “Amrah Bank”ın lisenziyaları aprelin 28-də, “AGBank”la “NBCBank”ın lisenziyaları mayın 12-də ləğv edilib. Rəsmi hesabata əsasən, 4 bankda 215 min əmanətçinin 686 milyon manat qorunan əmanəti var.
Qanuna görə, illik faiz dərəcəsi milli valyutada 10 faizdən, xarici valyutada 2,5 faizdən yüksək olmayan əmanətlər tam sığortalanıb. Əmanətlərin Sığortalanması Fondu 1 iyun 2020-ci ildən milli valyutada olan qorunan əmanətlər üzrə illik faiz dərəcəsini 12 faizə qaldırıb.
İyunun 29-na olan rəsmi məlumata əsasən, Əmanətlərin Sığortalanması Fondu ləğv prosesində olan bankların 8,9 min əmanətçisinə “Kapital Bank” və Azərbaycan Beynəlxalq Bankı vasitəsilə 100,4 milyon manat kompensasiya ödəyib.
“Atabank” və “Amrah Bank” əmanətçilərinə kompensasiyaların ödənməsinə iyunun 1-dən başlanıb. Kompensasiyalar nağdsız qaydada “Kapital Bank”ın adlı debet kartları və “Xəzri” sürətli pulköçürmə sistemi vasitəsilə 35 filialda verilir.
“AGBank” və “NBCBank” əmanətçilərinə kompensasiyaların ödənməsi iyunun 16-da start götürüb. Kompensasiyalar nağdsız qaydada Azərbaycan Beynəlxalq Bankının adlı debet kartları vasitəsilə 20 filialda ödənir.
Bağlanan banklarda nə qədər qorunan əmanət var?
