Əhali sayı üzrə yoluxma hesablanıb
Azərbaycanda koronavirus infeksiyasına yoluxmaların iqtisadi rayonlar üzrə göstəriciəri açıqlanıb. Bu rəsmi hesabat iyunun 27-nə olan vəziyyəti əks etdirir.
Novator.az bildirir ki, iyunun 27-də Azərbaycanda koronavirus infeksiyasına yoluxanların ümumi sayı 15 min 890 nəfər olub. Onlardan 193 nəfəri dünyasını dəyişib.
İyunun 29-da iqtisadçı Qubad İbadoğlu koronavirusa yoluxmaların iqtisadi rayonlar üzrə göstəricilərini əhalinin sayı ilə müqayisə edib.
Azərbaycanda əhalinin ümumi sayı 10 milyon 81 min nəfərdən çoxdur.
Ölkə əhalisinin 22,6 faizi paytaxt Bakıda yaşayır. Koronavirusa yoluxmaların 53,4 faizi Bakının payına düşür.
Əhali sayına nisbətdə ən çox yoluxma Abşeron iqtisadi rayonundadır. Bu iqtisadi rayona Abşeron, Xızı rayonları və Sumqayıt şəhəri daxildir. Ölkə əhalisinin 5,3 faizi Abşeron iqtisadi rayonunda yaşayır. Koronavirusa yoluxanların 15,8 faizi bu iqtisadi rayonda qeydə alınıb.
Azərbaycanda koronavirusa yoluxmaların 0,03 faizi ölkə əhalisinin 4,6 faizinin yaşadığı Naxçıvan iqtisadi rayonunda; 9,4 faizi ölkə əhalisinin 12,9 faizinin yaşadığı Gəncə-Qazax iqtisadi rayonunda; 1,3 faizi ölkə əhalisinin 6,3 faizinin yaşadığı Şəki-Zaqatala iqtisadi rayonunda; 6,1 faizi ölkə əhalisinin 9,6 faizinin yaşadığı Lənkəran iqtisadi rayonunda; 1,7 faizi ölkə əhalisinin 5,6 faizinin yaşadığı Quba-Xaçmaz iqtisadi rayonunda; 7,8 faizi ölkə əhalisinin 20,3 faizinin yaşadığı Aran iqtisadi rayonunda; 1,2 faizi ölkə əhalisinin 6,9 faizinin yaşadığı Yuxarı Qarabağ iqtisadi rayonunda; 1,3 faizi ölkə əhalisinin 3,3 faizinin yaşadığı Dağlıq Şirvan iqtisadi rayonunda qeydə alınıb.
Əhalinin 2,6 faizinin yaşadığı Kəlbəcər-Laçın iqtisadi rayonundakı yoluxmalara dair ayrıca məlumat yoxdur.
Azərbaycanda koronaviruslu xəstələrin 1,6 faizi bu infeksiyaya ölkə xaricində yoluxub.
2019-cu ilin dekabrında Çində üzə çıxaraq dünyanı bürüyən koronavirus xəstəliyi 504 mindən çox adamın həyatına son qoyub. Azərbaycanda ilk yoluxma fevralın 28-də, ilk itki martın 12-də qeydə alınıb. İyunun 28-nə olan rəsmi hesabata görə, ümumilikdə 16424 nəfərin koronavirusa yoluxması müəyyən edilib, onların 9026-sı müalicə olunaraq sağalıb, 198-i dünyasını dəyişib, 7200-ü xəstəxanalardadır.
