Samux reydi
Prezident İlham Əliyev iyunun 24-ü Samux rayonuna səfərində məcburi köçkün ailələri üçün inşa edilən yaşayış kompleksinin tikintisi ilə tanış olub. Qaçqınların və Məcburi Köçkünlərin İşləri üzrə Dövlət Komitəsinin sədri Rövşən Rzayev prezidentə deyib ki, Samux rayonunda 459 ailədən ibarət 1603 məcburi köçkün məskunlaşıb, onların böyük hissəsi Kəlbəcər rayonundandır.
Arayışa görə, inşasına bu ildən başlanan kompleksə 9 dördmərtəbəli yaşayış binası daxildir. Hər bir mənzilin tam təmirli vəziyyətdə təhvil verilməsi nəzərdə tutulub.
Dörd hektar sahəni əhatə edən yaşayış kompleksinə 144 şagird yerlik tam orta məktəb, 50 uşaq yerlik körpələr evi-uşaq bağçası, inzibati bina, tibb məntəqəsi və klub-icma mərkəzi daxildir.
İlham Əliyev həmin gün Samuxdakı “Aqro Dairy” MMC-nin aqroparkına baş çəkib. AZƏRTAC xəbər verir ki, 2019-cu ilin payızında 2423 hektar sahədə buğda, 222 hektar sahədə arpa, bu ilin yazında 74 hektar sahədə şəkər çuğunduru əkilib və taxıl biçini aparılan ərazilərdə qarğıdalı əkini nəzərdə tutulub.
“Aqro Dairy” MMC-nin icraçı direktoru Vahid Hacıyev dövlət başçısına aqroparkın fəaliyyəti barədə məlumat verib. Onun sözlərinə görə, Aqro Dairy” MMC Samuxda dövlət ehtiyat fondundan 5 min hektar, Tovuz rayonunda isə 12 min hektar ərazini uzunmüddətli icarəyə götürüb, həmin ərazilərdə suvarılan sahələr iki min hektardır.
Vahid Hacıyev qeyd edib ki, arpa biçini başa çatıb, Samux rayonunda hektardan 47-48 sentner məhsul götürülüb, Tovuzda isə hektardan 62-67 sentner məhsul alınıb: “Hazırda buğda biçini gedir. Biz Samuxda 1500 hektar buğda zəmisi biçmişik, hektardan məhsuldarlıq orta hesabla 58 sentnerdir. Bəzi torpaqlarımızda məhsuldarlıq 65-67 sentner olub.
Tovuzda göstəricilərimiz orta hesabla 78 sentnerdir. Bizim pivot suvarma sistemi ilə təchiz olunmuş 70 hektar ərazimiz var. Bu 70 hektarın bəzi sahələrində hektardan məhsuldarlıq 84-85 sentnerdir”.
Buğda, arpa, şəkər çuğunduru və qarğıdalı məhsullarının istehsal olunduğu aqroparkda xaricdən alınan müasir avadanlıq quraşdırılıb, 60 min tonluq taxıl anbarı kompleksi yaradılıb. Burada 89 nəfər işlə təmin olunub.
