Prezident hərbi hissədə çıxış edib
Prezident İlham Əliyev iyunun 25-də Mingəçevir şəhərinə səfər edib.
AZƏRTAC xəbər verir ki, dövlət başçısının iştirakı ilə “Azərbaycan” İstilik Elektrik Stansiyasının 330 və 500 kilovoltluq açıq paylayıcı qurğuları, 8 enerji bloku, İdarəetmə Dispetçer Mərkəzi, stansiyanın əsas və köməkçi sahələri, bina və qurğuları əsaslı yenidənqurmadan sonra istifadəyə verilib.
Sonra İlham Əliyev Dövlət Rəmzləri Muzeyinin açılışında iştirak edib.
Ardınca prezident, Silahlı Qüvvələrin ali baş komandanı Müdafiə Nazirliyinin N saylı hərbi hissəsinin açılışına qatılıb. Müdafiə nazirinin birinci müavini-Silahlı Qüvvələrin Baş Qərargah rəisi general-polkovnik Nəcməddin Sadıqov və müdafiə nazirinin müavini-Hərbi Hava Qüvvələrinin komandanı general-leytenant Ramiz Tahirov İlham Əliyevə raport veriblər.
Hərbi hissədə yaradılan şəraitlə tanış olduqdan sonra İlham Əliyev komanda heyəti ilə görüşüb, çıxış edib.
Azərbaycan Xalq Cümhuriyyəti Nazirlər Şurası 26 iyun 1918-ci ildə ilk ordu hissəsi – əlahiddə Azərbaycan korpusu yaradıb. 1998-ci ildə iyunun 26-sı Azərbaycan Respublikasının Silahlı Qüvvələri Günü elan olunub. Silahlı Qüvvələr Azərbaycan Ordusundan və başqa silahlı birləşmələrdən ibarətdir.
