Operativ qərargahın 24 iyun məlumatı
Nazirlər Kabineti yanında operativ qərargahın 24 iyun məlumatına görə, Azərbaycanda daha 590 nəfər koronavirus infeksiyasına yoluxub, 265 nəfər sağalaraq xəstəxanadan buraxılıb, 7 xəstə vəfat edib.
Yoluxanların ümumi sayı 14 min 305 nəfər göstərilir: onların 7768-i müalicə olunaraq sağalıb, 174-ü vəfat edib, 6363-ü aktiv xəstədir.
2019-cu ilin dekabrında Çində üzə çıxaraq dünyanı bürüyən koronavirus xəstəliyi 481 min nəfərin həyatına son qoyub.
Azərbaycanda ilk yoluxma fevralın 28-də, ilk itki martın 12-də qeydə alınıb.
www.worldometers.info-nun yaydığı beynəlxalq statistikaya görə, Azərbaycan koronavirusun yayıldığı 215 ölkə, ərazi və məkan arasında yoluxma üzrə 57-ci, ölənlərin sayı üzrə 67-ci, aktiv xəstə sayı üzrə 44-cü yerdədir.
Ölkədə xüsusi karantin rejimi var: sərhədlər qapadılıb, dəfn istisna olmaqla yas mərasimləri, kütləvi tədbirlər, toy məclisləri yasaqlanıb və başqa məhdudiyyətlər tətbiq olunub.
İyunun 21-dən Bakı, Sumqayıt, Gəncə, Lənkəran, Yevlax, Masallı, Cəlilabad şəhərləri və Abşeron rayonunda iri ticarət mərkəzləri, ictimai iaşə obyektləri, muzey və sərgi zalları, bərbərxanalar, gözəllik salonları bağlanıb, evdən çıxmaq icazə əsasında mümkündür.
