Həbsin uzadılması: şikayət təmin olunmadı
Bakı Apellyasiya Məhkəməsində Tofiq Yaqublunun həbs müddətinin uzadılmasından verilmiş şikayətə baxılıb.
Demokratik Qüvvələrin Milli Şurasının Koordinasiya Mərkəzinin üzvü, müsavatçı Tofiq Yaqublu martın 22-də tutulub. O, silah qismində istifadə olunan əşyalardan istifadə etməklə xuliqanlıqda təqsirli bilinir. Bu ittiham iki ildən altı ilədək müddətə azadlıqdan məhrumetmə cəzası nəzərdə tutur.
Rəsmi ittihama əsasən, Tofiq Yaqublu martın 22-də idarə etdiyi avtomobillə Bakının Nizami rayonunun Naxçıvanski küçəsində qaydaları pozub, Cəbrayılov Elxan Səttar oğlunun idarə etdiyi avtomobillə toqquşub.
Tofiq Yaqublunun mübahisə zəminində Elxan Cəbrayılovu yumruqla və vintaçan alətlə zərbələr vurub xəsarətlər yetirdiyi, onun avtomobildə olan yoldaşı Cəvahir Cəbrayılovanı əli ilə itələyib xəsarət yetirdiyi bəyan olunub, martın 23-də Nizami Rayon Məhkəməsi Tofiq Yaqublu barəsində 3 ay müddətinə həbs qətimkan tədbiri seçib.
İyunun 19-da məhkəmə Nizami Rayon Polis İdarəsinin müstəntiqi Ramil Əliyevin vəsatəti əsasında həbs müddətini iki ay uzadıb.
Müdafiə tərəfi qərardan apellyasiya şikayəti verib. İyunun 24-də şikayətə baxan Bakı Apellyasiya Məhkəməsi həbsin iki ay uzadılması haqda rayon məhkəməsinin çıxardığı qərarı qüvvədə saxlayıb.
Qapalı keçirilən məhkəmə iclasında Tofiq Yaqublu özü də iştirak edib. Vəkil Aqil Layıc “Azadlıq” radiosuna deyib ki, Tofiq Yaqublu özünü təqsirli bilmir: “Həbsin uzadılması üçün maddi və prosessual əsaslar yoxdur. Amma məhkəmə şikayətimizi təmin etmədi. Tofiq Yaqublu ilk gündən təqsirsiz olduğunu, sifarişlə həbs olunduğunu bildirir”.
Aqil Layıc onu da qeyd edib ki, istintaq dövründə Tofiq Yaqublunun həbsdə saxlanması qərarından Avropa İnsan Hüquqları Məhkəməsinə şikayət göndərilib.
Tofiq Yaqublu Şüvəlan qəsəbəsindəki 3 saylı İstintaq Təcridxanasında saxlanır.
1961-ci il təvəllüdlü Tofiq Yaqublu Moskva Kooperasiya Universitetini bitirib. Milli azadlıq hərəkatının fəalı, Qarabağ müharibəsi veteranıdır. Əbülfəz Elçibəyin prezidentliyi dövründə (1992-1993) Binəqədi Rayon İcra Hakimiyyəti başçısının birinci müavini vəzifəsində çalışıb. 1992-ci ildən Müsavat Partiyasının üzvüdür. 2010-2018-ci illərdə partiya başqanının müavini postunu tutub.
Tofiq Yaqublu 2013-cü il fevralın 4-də, İsmayıllıda hökumət əleyhinə iğtişaşlar (23-24 yanvar 2013-cü il) təşkil etmək ittihamı ilə tutularaq 5 il azadlıqdan məhrumetmə cəzası alıb, 2016-cı il martın 17-də əfv sərəncamı əsasında azadlığa çıxıb.
Tofiq Yaqublunun qızı, müsavatçı Nigar Həzi 2012-2013-cü illərdə həbsdə olub. Nigar jurnalist, AXCP sədrinin müavini Seymur Həzinin həyat yoldaşıdır. Onlar 2016-cı ilin avqustunda, Seymur həbsdə olarkən ailə qurublar. Seymur Həzi 2014-cü il avqustun 29-da tutulub, 5 il müddətinə azadlıqdan məhrum edilib, 2019-cu il avqustun 29-da həbs cəzasını başa vuraraq azadlığa buraxılıb.
Tofiq Yaqublunun digər qızı Nərgiz Yaqublu da müsavatçı olub. O, 2015-ci ilin aprel ayında, atası həbsdə olan vaxt vəfat edib.
Tofiq Yaqublu yenə həbsə gedir
Tofiq Yaqublunun məhkəməsi qapalı keçiriləcək
Ev dustaqlığına da yox deyildi
Tofiq Yaqublu nədən narazıdır?
