Qırğızıstan paytaxtı Bişkekin Pervomaysk Rayon Məhkəməsi iyunun 23-də sabiq prezident Almazbek Atambayevə 11 il 2 aylıq azadlıqdan məhrumetmə cəzası kəsib. Novator.az-ın məlumatına görə, keçmiş dövlət başçısı 2013-cü ildə kriminal avtoritet Əziz Batukayevi həbsdən saxta tibbi sənədlər əsasında qanunsuz buraxdırmaqda təqsirli bilinib.

Məhkəmə qərarı sabiq prezidentin dövlət təltiflərindən məhrum edilməsini, əmlakının bir hissəsinin müsadirə olunmasını da nəzərdə tutur.

Almazbek Atambayev prezident postunu 2011-2017-ci illərdə tutub. 2019-cu il avqustun 8-də həbs edilib. Həbsdən bir gün öncə, avqustun 7-də hüquq mühafizə orqanlarının əməkdaşları sabiq prezidenti tutmaq istəyərkən silahlı müqavimətlə üzləşiblər, Milli Təhlükəsizlik Komitəsinin bir zabiti həlak olub. Almazbek Atambayevə bu qarşıdurma ilə bağlı əlavə cinayət işləri açılıb.

Qırğızıstanda ali icraedici orqan hökumətdir. Hökuməti 120 yerlik parlamentdə deputatların yarıdan çoxunu təşkil edən fraksiya və ya koalisiya qurur. Dövlət başçısı olan prezident isə ümumxalq seçkisində 6 il müddətinə seçilir. Heç kim bir dəfədən artıq prezident seçilə bilməz. İndiki prezident Sooronbay Jeenbekov 2017-ci ildən bu postdadır. Almazbek Atambayevlə Sooronbay Jeenbekov müttəfiq olublar. Amma Sooronbay Jeenbekovun prezidentliyi dövründə münasibətlər pozulub.