“Tarixi şəxsiyyətlər”in yeni sayı
“Tarixi şəxsiyyətlər” jurnalının növbəti sayı İkinci Dünya müharibəsində faşizm üzərində qələbənin 75-ci ildönümünə həsr olunub.
Nəfis şəkildə tərtiblənmiş dərgi Azərbaycan prezidenti İlham Əliyevin Rusiyanın “Nasionalnaya oborona” jurnalına müsahibəsi ilə açılır. Daha sonra Rusiya prezidenti Vladimir Putinin İkinci Dünya müharibəsində qələbənin növbəti ildönümü münasibətilə veteranlara, Rusiya vətəndaşlarına və qələbədə payı olan bütün xalqlara təbriki verilib.
Jurnalda həmçinin oxuculara SSRİ Dövlət Müdafiə Komitəsinin sədri İosif Stalinin 1941-ci il iyulun 3-də əhaliyə müraciəti təqdim olunub, almanların “Barbarossa” planının mahiyyəti, müharibənin gedişində ayrı-ayrı məşhur döyüşlər, SSRİ və müttəfiqlərin müxtəlif mərhələlərdə birgə hərəkəti haqda müxtəlif materiallar dərc edilib.
Jurnalın “Dahi sərkərdələr” rubrikasındakı marşallar Jukov, Konev, Vasilyevski barədə bilgilər və iki dəfə Sovet İttifaqı Qəhrəmanı, general-mayor Həzi Asanovdan bəhs edən “General Həzi Aslanov – Azərbaycan vətənpərvərliyinin güzgüsü”, Sovet İttifaqı Qəhrəmanı, akademik Ziya Bünyadovun portret cizgilərinin canlandırıldığı “Böyük əfsanənin izi” məqalələri işı üzü görüb.
“Azərbaycan Böyük Vətən Müharibəsi illərində…”, “Soydaşlarımızın qələbə töhfələri”, “Azərbaycanın qəhrəman təyyarəçiləri” və digər yazılarda, eləcə də general-polkovnik Tofiq Ağahüseynovun, polkovnik, siyasi elmlər üzrə fəlsəfə doktoru Cəlil Xəlilovun qeydlərində dünyanı bürüyən fazizm kabusuna qarşı mübarizə salnamələrindən söhbət açılıb.
“Tarixi şəxsiyyətlər” jurnalının təsisçisi və baş redaktoru Xəlil Qarəhmədovdur.
