Naxçıvanın sosial-iqtisadi göstəriciləri
Naxçıvan Muxtar Respublikasının Dövlət Statistika Komitəsi yeni hesabat yayıb. Novator.az bildirir ki, rəsmi açıqlamaya görə, 2020-ci ilin yanvar-may aylarında muxtar respublikada 1 milyard 7,2 milyon manatlıq ümumi daxili məhsul istehsal olunub, bu da 2019-cu ilin eyni dövrü ilə müqayisədə 0,9 faiz çoxdur.
Hər bir nəfərə düşən ümumi daxili məhsulun həcmi 2190 manat göstərilir.
Sənaye sahəsində 2019-cu ilin ilk beş ayına nəzərən 1 faiz, sərmayə yatırımında 1,3 faiz, kənd təsərrüfatı məhsulları istehsalında 3,3 faiz, informasiya və rabitə xidmətlərinin dəyərində 1,9 faiz, kreditlərin həcmində 1,8 dəfə yüksəliş olduğu vurğulanır.
Hesabata əsasən, muxtar respublikada 383 növdə məhsul istehsal olunur, 350 növdə məhsula tələbatı yerli imkanlar hesabına ödənir.
Beş ayda muxtar respublikada 155,5 milyon ABŞ dolları dəyərində xarici ticarət dövriyyəsinin qeydə alındığı, ixracın idxalı 100,8 milyon dollar üstələdiyi bildirilir.
Məlumata görə, mayın 1-nə muxtar respublika iqtisadiyyatında bir işçiyə hesablanmış orta aylıq əməkhaqqı 520 manata çatıb.
