Karantin jurnalistə məhdudiyyət qoya bilərmi?
İyunun 21-dən Bakı, Sumqayıt, Gəncə, Lənkəran, Yevlax, Masallı, Cəlilabad şəhərləri və Abşeron rayonu ərazisində tətbiq olunan sərt karantin rejimi jurnalistlərin də fəaliyyətini məhdudlaşdırıb. Nazirlər Kabinetinin rejimin sərtləşdirilməsi haqda iyunun 19-da qəbul etdiyi qərar jurnalistlərin xidməti vəsiqə əsasında hərəkət etməsinə yol vermir. Qərara görə, media nümayəndələri yalnız o halda sərbəst hərəkət edə bilərlər ki, işəgötürən onlar barəsində məlumatları gücləndirilmiş elektron imza vasitəsilə İcaze.e-gov.az portalına daxil etsin.
Novator.az bildirir ki, hüquqşünas Ələsgər Məmmədli 19 iyun qərarının mediaya aid hissəsini konstitusiyaya və digər qanunlara zidd sayır: “Karantin rejimi dövründə jurnalistlərin fəaliyyəti məhdudlaşdırıla bilməz. Belə bir məhdudiyyət yalnız fövqəladə və hərbi vəziyyət elan olunduqda mümkündür. Başqa hallarda, o cümlədən karantin rejimi zamanı media mənsublarının fəaliyyətinə məhdudiyyət nəzərdə tutulmur. Nazirlər Kabinetinin karantin zamanı jurnalistlərin fəaliyyətini tənzimləmək hüququ yoxdur”.
“Facebook”da şərh yayan Ələsgər Məmmədli hesab edir ki, hazırkı karantin günlərində peşə fəaliyyətini həyata keçirərkən saxlanan, barəsində akt tərtib olunan jurnalistlər məhkəməyə müraciət edə bilərlər: “Onların fəaliyyətinə mane olanlar hüquqi məsuliyyət daşıyacaqlar”.
Hüquqşünasın fikrincə, yerli məhkəmələr jurnalistlərin iddiasını təmin etməsə, media mənsubları Avropa İnsan Hüquqları Məhkəməsinə üz tuta bilərlər. Ələsgər Məmmədli həmin iddiaların Avropa Məhkəməsində təmin olunacağına əmindir.
