Ermənistan Konstitusiyası necə yenilənir?
Ermənistan parlamenti iyunun 22-də konstitusiya dəyişikliyi layihəsini qəbul edib. Novator.az-ın məlumatına görə, ana qanunun 213-cü maddəsində nəzərdə tutulan dəyişiklik Konstitusiya Məhkəməsinin tərkibini yeniləmək məqsədi daşıyır.
213-cü maddəni bu il aprelin 5-i referendumda dəyişdirmək planı vardı. Ancaq koronavirus pandemiyası buna imkan vermədi.
İyunun 3-də parlament referendumun ləğvi və ümumxalq səsverməsinə çıxarılan məsələnin həllinin ali qanunverici orqana ötürülməsini nəzərdə tutan layihəni qəbul edib.
Parlamentdə çoxluq əksəriyyəti baş nazir Nikol Paşinyanın Vətəndaş Sazişi Partiyasının üzvü olan “Mənim addımım” blokunun əlindədir.
Konstitusiya Məhkəməsi 9 hakimdən ibarətdir. Uzun müddətdir bu qurumla Ermənistan hökuməti arasında ziddiyyətlər yaşanır.
Ermənistanın ana qanununa 2015-ci ildə salınaraq 2018-ci ildə tam qüvvəyə minmiş normaya görə, Konstitusiya Məhkəməsi hakiminin səlahiyyət müddəti 12 ildən artıq ola bilməz. Ancaq bu norma əvvəllər təyin olunmuş hakimlərə aid edilməyib.
İyunun 22-si parlamentdə iki oxunuşdan keçən dəyişiklik layihəsinə əsasən, 12 ildən artıq Konstitusiya Məhkəməsinin hakimi olmuş şəxslərin səlahiyyətinə xitam veriləcək, sədr yenidən seçiləcək. Sədr postunu 2018-ci ildən Qrayr Tovmasyan tutur.
Müxalif fraksiyalar parlamentin 22 iyun iclasını boykot edib.
