![]({"full":{"0":"2020\/06\/Bash-Prokurorluq-1.jpg","1":754,"2":449,"3":false,"file":"https:\/\/novator.az\/wp-content\/uploads\/2020\/06\/Bash-Prokurorluq-1.jpg"}})
İlk dəfə: iki qadın prokuror təyin olundu
- 19 İyun 2020
- comments
- Səidə Hüseynova
- Posted in ManşetXəbər
Baş Prokurorluğun mətbuat xidmətinin 19 iyun məlumatına görə, müstəqil Azərbaycanın tarixində ilk dəfə xanım əməkdaşlar rayon prokuroru vəzifələrinə təyinat alıblar: Səadət Rüstəmova Qobustan rayon prokuroru, Lalə Hüseynova Zəngilan rayon prokuroru vəzifəsinə gətiriliblər.
Xəbərdə qeyd olunur ki, baş prokurorun əmri ilə gerçəkləşən təyinatlara qədər Səadət Rüstəmova Bakının Nizami rayon prokurorunun köməkçisi vəzifəsini, Lalə Hüseynova Baş Prokurorluğun böyük prokuror-metodisti postunu tutub.
Novator.az bildirir ki, Azərbaycanda prokurorluq orqanının əsası 1918-ci ildə Azərbaycan Xalq Cümhuriyyəti Nazirlər Şurasının qərarı ilə qoyulub.
Cümhuriyyət süqut etdikdən sonra, 12 may 1920-ci ildə prokurorluq ləğv edilib.
Azərbaycan Mərkəzi İcraiyyə Komitəsinin 11 iyul 1922-ci il dekreti ilə prokurorluq yenidən yaradılıb.
1936-cı ilin iyul ayında prokurorluq Xalq Ədliyyə Komissarlığının tərkibindən çıxarılaraq SSRİ Prokurorluğuna tabe edilib.
1991-ci ildən Azərbaycan Respublikasının Prokurorluğu müstəqil qurumdur.
Konstitusiyaya görə, Azərbaycan Respublikasının Prokurorluğu ərazi və ixtisaslaşdırılmış prokurorların baş prokurora tabeliyinə əsaslanan vahid mərkəzləşdirilmiş orqandır.
Bu il mayın 1-də Milli Məclis prezident İlham Əliyevin təqdimatına baxaraq Kamran Əliyevi baş prokuror təyin edib. Onun səlahiyyət müddəti 5 ildir.
1965-ci il təvəllüdlü Kamran Əliyev İrkutsk Dövlət Universitetinin (Rusiya) hüquq fakültəsini bitirib, həmçinin aspirantura təhsili alıb. Hüquq elmləri namizədidir. Son təyinata qədər Baş Prokuror yanında Korrupsiyaya Qarşı Mübarizə Baş İdarəsinin rəisi və baş prokurorun müavini olub.