Fransa saytı cəbhə fəalından yazıb
Fransanın “Les nouveaux dissidents” (“Yeni dissidentlər”) portalı AXCP fəalı Aqil Hümmətovla bağlı məqalə dərc edib. Xəbəri AXCP sədri Əli Kərimli yayıb.
Novator.az bildirir ki, sosial şəbəkələrdə hakimiyyəti sərt tənqid etməsi ilə tanınan AXCP fəalı Aqil Hümmətov bu il martın 30-da tutularaq Bakının Maştağa qəsəbəsindəki 1 saylı Psixiatriya Xəstəxanasına salınıb. Aprelin 1-də Sabunçu Rayon Məhkəməsi onun ruhi xəstə olmadığını əsas gətirərək sərbəst buraxılmasına qərar verib. Ancaq aprelin 2-də Aqil Hümmətov yenidən tutulub, aprelin 3-də Bakı Apellyasiya Məhkəməsinin qərarı ilə həmin xəstəxanaya yerləşdirilib.
“Les nouveaux dissidents”dəki məqalədə hökumət tənqidçilərini psixi xəstə adı ilə psixiatriya xəstəxanalarında məcburi saxlamağın keçmiş SSRİ-yə, Dövlət Təhlükəsizliyi Komitəsinə xas metod olduğu vurğulanır. Qeyd olunur ki, Aqil Hümmətov ailəsini çətinliklə dolandırıb və şərlənərək dəlixanaya salınıb.
Martın 22-dən bəri 16 AXCP fəalına müxtəlif inzibati xətalar üzrə həbs cəzası verilib.
AXCP sədrinin köməkçisi Faiq Əmirli və mühafizəçisi Ruslan Əmirov iki dəfə məhkum ediliblər.
AXCP sədrinin mühafizəçisi Niyaməddin Əhmədova inzibati həbsdən sonra cinayət işi qaldırılıb, barəsində həbs qətimkan tədbiri seçilib.
Son vaxtlar daha 3 cəbhəçi cinayət məsuliyyətinə cəlb olunub, onların biri – Zamin Salayev həm də məhkum edilib.
Cinayət məsuliyyətinə alınan digər cəbhəçilər “Azadlıq” qəzetinin əməkdaşı Təzəxan Mirələmli (məhkəməsi gedir) və Səid Məmmədzadədir (həbs edilib).
