Borclunun əmlakı: qanun dəyişikliklərində nələr var?
Prezident İlham Əliyev Vergi Məcəlləsində, “Qiymətləndirmə fəaliyyəti haqqında” və “İcra məmurları haqqında” qanunlarda dəyişiklikləri imzalayıb.
Novator.az bildirir ki, Vergi Məcəlləsində yeniliyə görə, vergi ödəyicisinin siyahıya alınmış əmlakının məhkəmənin qərarı ilə qiymətləndirildiyi, habelə tənzimlənən qiymətlərin tətbiq olunduğu hallar istisna olmaqla vergi ödəyicisinin siyahıya alınmış əmlakının qiymətləndirilməsini qiymətləndirici həyata keçirir.
İcra məmuru qiymətləndirmə sahəsində ixtisaslaşmış və 5 ildən az olmayaraq fəaliyyət göstərən, ağır və ya xüsusilə ağır cinayətlərə, habelə korrupsiya cinayətləri və qulluq mənafeyi əleyhinə olan cinayətlərə və ya iqtisadi sahədə olan cinayətlərə görə məhkum edilməyən qiymətləndiricini dəvət etməlidir. Eyni müddəa “Qiymətləndirmə fəaliyyəti haqqında” qanuna da salınıb.
“İcra məmurları haqqında” qanunda yeniliyə əsasən, tələbin borclunun əmlakına, o cümlədən nağd, yaxud banklarda və ya digər kredit təşkilatlarındakı hesablarda və əmanətlərdə, habelə saxlancda olan pul vəsaitlərinə və başqa sərvətlərinə yönəldilməsi zamanı qəbul olunmuş qərar (əmlakın üzərinə həbs qoyulması və s.) barədə 1 iş günündən gec olmayaraq qarşılıqlı inteqrasiya olunmuş elektron sistem vasitəsilə “Elektron hökumət” portalında müvafiq qeydlər aparılmalı; icra sənədində göstərilmiş tələblər aydın olmadıqda həmin icra sənədinin verilməsi üçün əsas olmuş qərarın, habelə qanuna əsasən icra sənədi sayılan sənədin izah olunması barədə müvafiq məhkəməyə və ya digər orqana ərizə ilə müraciət edilməli; icra sənədlərinin aidiyyəti üzrə göndərilməsi barədə tələbkara məlumat verilməli; qanunla müəyyən edilmiş hallarda və müddətlərdə borclunun əmlakının mühafizəsi təmin edilməlidir.
