Sərhəddə insident
Dövlət Sərhəd Xidmətinin məlumatına görə, iyunun 17-si saat 21:40 radələrində Sərhəd Qoşunlarının Cəlilabadın Kürünc kəndi yaxınlığındakı zastavasının xidməti ərazisində 3 şəxsin İrandan Azərbaycan istiqamətində dövlət sərhədini pozması aşkar olunub: “Sərhəd pozucularının silah və gecə görmə cihazları ilə silahlanması, onlardan birinin üzərində içərisində narkotik vasitə olması ehtimal edilən 1 ədəd böyük kisədə yük müşahidə edilib. Zastava “Silaha” komandası üzrə qaldırılıb, xidməti ərazi qapadılıb, İran sərhədçiləri hadisə haqqında məlumatlandırılıb.
Sərhəd naryadı “Dayan” əmri verərək havaya xəbərdarlıq atəşi açıb. Lakin sərhəd pozucuları əmrə tabe olmayıb, sərhəd naryadına qarşı avtomat silahdan və “Vinçester” tipli tüfəngdən atəş açıblar.
Silah tətbiq olunub, sərhəd pozucularından biri güllə yarası alıb və İran ərazisinə qaçmaq məqsədilə sərhəd çayını keçərkən suda ölüb. Onun meyitini İran sərhədçiləri sudan çıxarıb. Digər sərhəd pozucuları geri qaçıb və İran ərazilərində saxlanıblar.
Hadisə yerində Azərbaycan və İran sərhəd nümayəndələrinin görüşü keçirilib.
Dövlət Sərhəd Xidmətinin Sərhəd Qoşunlarının “Göytəpə” sərhəd dəstəsinin və Lənkəran Hərbi Prokurorluğunun əməkdaşları zəruri əməliyyat-istintaq hərəkətləri həyata keçirir”.
