“Qarabağ” çempion elan olundu
Azərbaycan Futbol Federasiyaları Assosiasiyasının İcraiyyə Komitəsi iyunun 18-də iclas keçirib. Novator.az-ın məlumatına görə, iclasda milli çempionatı və ölkə kuboku oyunlarını davam etdirməmək qərarı verilib. Qərar koronavirus pandemiyası ilə əlaqədar yaranmış vəziyyət, infeksiyanın yoluxma statistikasının yüksəlməsi, ölkədə karantin rejiminin iyulun 1-dək uzadılmasından sonra komandaların məşqləri üçün vaxt azlığı, klubların ehtimal olunan maliyyə çətinliyi məsələləri, futbolçuların, məşqçilərin və oyunların təşkilində iştirak edən şəxslərin sağlamlığının qorunması zərurəti ilə əsaslandırılıb.
2019-2020 mövsümü koronavirus pandemiyasına üzündən mart ayında dayandırılıb.
18 iyun qərarına əsasən, yüksək liqanın lideri “Qarabağ” çempion elan olunub. Bu, “Qarabağ”ın 8-ci çempionluğudur. Klub 2020-2021 mövsümündə ölkəni UEFA Çempionlar Liqasında təmsil edəcək.
“Neftçi” gümüş, “Keşlə” bürünc mükafatçı sayılıb. Bu klublar, eləcə də dördüncü pillədə qərar tutan “Sumqayıt” Avropa Liqasında yarışacaqlar.
İlk çempionatın keçirildiyi 1992-ci ildən bəri “Neftçi” 8 dəfə, “Kəpəz” 3 dəfə, “Şəmkir”, “Bakı” və “İnter” 2 dəfə, “Turan” və “Xəzər Lənkəran” 1 dəfə çempion olub.
