İşsizə pul vermək qaydaları yenilənir
2018-ci il yanvarın 1-də qüvvəyə minən işsizlikdən sığorta qanununa əsasən, dövlət orqanının və ya hüquqi şəxsin ləğvi və ya işçilərin sayı və ya ştatların ixtisarı nəticəsində əmək münasibətlərinə xitam verilmiş, işsiz kimi qeydiyyata alınmış şəxs sığorta ödənişi ala bilər. Bunun üçün azı 3 il sığorta stajı tələb olunur.
Sığorta ödənişi işçinin sığorta stajından asılı olaraq onun itirilmiş orta aylıq əməkhaqqının məbləğinə müəyyən faiz dərəcələri tətbiq olunmaqla hesablanır. İşçinin sığorta stajı 3 ildən 5 ilə qədər olduqda onun itirilmiş orta aylıq əməkhaqqının məbləğinin 50%-i, sığorta stajı 5 ildən 10 ilə qədər olduqda 55%-i, sığorta stajı 10 ildən yuxarı olduqda 60%-i məbləğində aylıq sığorta ödənişi verilir.
Əmək və Əhalinin Sosial Müdafiəsi Nazirliyinin 18 iyun məlumatında qeyd olunur ki, “İşsizlikdən sığorta haqqında” qanuna dəyişiklik layihəsi hazırlanıb: “Layihə azı 1 il sığorta stajı olan şəxslərə sığorta ödənişinin təyin olunmasını nəzərdə tutur. Həmçinin müddətli əmək müqaviləsinin müddətinin bitməsi əsasında əmək müqaviləsinə xitam verilmiş şəxslərə də sığorta ödənişinin təyin olunması təklif edilir.
Layihədə işsizlikdən sığorta ödənişinin hesablanması, işsizlikdən sığorta ödənişlərinin elektron qaydada təyinatı ilə bağlı təkliflər də əksini tapır”.
