İlham Əliyev Moskva paradına getmir
Prezidentin mətbuat xidmətinin məlumatına görə, dövlət başçısı İlham Əliyev iyunun 18-də rusiyalı həmkarı Vladimir Putinə zəng edib. O, Azərbaycanda koronavirus pandemiyasına görə tətbiq olunan karantin rejimi üzündən Moskvada keçiriləcək hərbi paradda iştirakının mümkün olmadığını bildirib. Vladimir Putin vəziyyətə anlayışla yanaşdığını vurğulayıb.
1941-1945-ci illərin Almaniya-SSRİ müharibəsində qələbənin 75 illiyinə həsr edilən parad iyunun 24-nə təyin olunub. Azərbaycanı paradda müdafiə naziri Zakir Həsənov və Azərbaycan Ordusunun 75 nəfər hərbi qulluqçusu təmsil edəcək.
Dövlət başçıları Rusiya-Azərbaycan sərhədində yaranmış vəziyyətlə bağlı fikir mübadiləsi aparıblar. İlham Əliyev bildirib ki, Rusiya prezidenti ilə bu il mayın 18-dəki telefon danışığından ötən dövr ərzində Samur keçid məntəqəsindən 700-ə yaxın, bütövlükdə bir ay ərzində isə quru və hava yolları ilə 1000-ə yaxın Azərbaycan vətəndaşı gətirilib.
Prezidentlər müvafiq dövlət strukturlarına sərhəddə vəziyyətin tənzimlənməsi ilə əlaqədar əlavə tapşırıqların verilməsi barədə razılaşıblar.
1939-cu ildə Almaniya və müttəfiqləri İkinci Dünya müharibəsinə başlayıb. 1941-ci ildə Almaniya SSRİ-yə hücum edib, bu müharibə 1945-ci il mayın 9-da SSRİ və müttəfiqlərinin qələbəsi ilə bitib. Həmin müharibədə Azərbaycandan 600 mindən çox adam döyüşüb, onların təxminən yarısı həlak olub.
Qələbənin 75 illiyi ilə bağlı hərbi parad mayın 9-da keçirilməli idi. Ancaq koronavirus xəstəliyi tarixin dəyişməsinə gətirib.
