Əminə Rüstəmzadə: “Zəif anıma təsadüf etdi”
Gənc fəal İlkin Rüstəmzadənin həyat yoldaşı Əminə Rüstəmzadə iyunun 17-də xəstəxanadan buraxılıb. “Facebook”da yaydığı açıqlamada İlkin Əminənin evdə olduğunu, özünü yaxşı hiss etdiyini vurğulayıb.
İyunun 17-də Əminənin çoxlu yuxu dərmanı içərək intihara cəhd etdiyi, Bakıdakı Kliniki Tibbi Mərkəzə yerləşdirildiyi xəbər verilmişdi. İlkin Əminənin təhdidlər altında olduğunu bildirərək qeyd etmişdi ki, Daxili İşlər Nazirliyinin əməkdaşı onu susdurmaq üçün yoldaşını hədələyir.
Novator.az-ın məlumatına görə, Əminə iyunun 17-si xəstəxanadan çıxandan sonra özünün “Facebook” səhifəsində bunları yazıb: “Psixoloji olaraq hərəkətlərimi təhlil edəcək durumda deyiləm. Bir yerdən sonra dözmək çətin olur. Zəif anıma təsadüf etdi. Amma nə olmağından asılı olmayaraq sistemin qarşısında güclü dayanmalıyıq”.
“Nida” Vətəndaş Hərəkatının İdarə Heyətinin üzvü İlkin Rüstəmzadə hakimiyyəti tənqid etməsi ilə tanınır. 1992-ci il təvəllüdlü İlkin Rüstəmzadə 2013-cü ilin mayında həbs olunaraq kütləvi iğtişaşların təşkili, qrup halında xuliqanlıq və ictimai asayişin pozulmasının qarşısını alan hakimiyyət nümayəndəsinə müqavimət göstərməklə xuliqanlıqda təqsirli bilinib, 8 il müddətinə azadlıqdan məhrum edilib, 2019-cu il martın 16-da əfv olunub.
Əminə jurnalist fəaliyyəti ilə məşğuldur. O, İlkinlə 2020-ci ildə ailə qurub.
