İlkin Rüstəmzadə yoldaşının intihara cəhd etdiyini bildirir
Gənc fəal İlkin Rüstəmzadə iyunun 17-si özünün “Facebook” səhifəsində açıqlama yayaraq həyat yoldaşı Əminə Rüstəmzadənin intihara cəhd etdiyini bildirib. Onun sözlərinə görə, yoldaşı çoxlu yuxu dərmanı içib.
Bakıdakı Kliniki Tibbi Mərkəzə aparılan Əminə Rüstəmzadənin reanimasiyaya yerləşdirildiyi bildirilir.
İlkin Rüstəmzadə həyat yoldaşının təhdidlər üzündən intihara cəhd etdiyini yazır. O qeyd edir ki, bir müddət əvvəl Daxili İşlər Nazirliyinin əməkdaşı “Facebook”da yoldaşını hədələyib, üç gün əvvəl yenə xəbərdarlıq edib ki, İlkin susmasa, əvvəlki təkrarlanacaq.
“Nida” Vətəndaş Hərəkatının İdarə Heyətinin üzvü İlkin Rüstəmzadə hakimiyyəti tənqid etməsi ilə tanınır. 1992-ci il təvəllüdlü İlkin Rüstəmzadə 2013-cü ilin mayında həbs olunaraq kütləvi iğtişaşların təşkili, qrup halında xuliqanlıq və ictimai asayişin pozulmasının qarşısını alan hakimiyyət nümayəndəsinə müqavimət göstərməklə xuliqanlıqda təqsirli bilinib, 8 il müddətinə azadlıqdan məhrum edilib, 2019-cu il martın 16-da əfv olunub.
Əminə jurnalist fəaliyyəti ilə məşğuldur. O, İlkinlə 2020-ci ildə ailə qurub.
