2016-dan bəri ilk dəfə…
İqtisadçı Samir Əliyev xarici ticarət göstəriciləri ilə bağlı şərh yayıb. Novator.az-ın məlumatına görə, ekspert son dörd ildə ilk dəfə xarici ticarət balansında kəsir qeydə alınmasına diqqət çəkir: “Dövlət Gömrük Komitəsinin hesabatına əsasən, 2020-ci ilin may ayında idxalın (782,5 milyon dollar) ixracı (665,5 milyon dollar) üstələməsi səbəbindən 117 milyon dollarlıq kəsir rəsmiləşib. Xarici ticarətdə son mənfi saldo 2016-cı ilin oktyabr ayında (112,6 milyon dollar) yaranmışdı.
Beş aylıq göstəricilərə gəlincə, xarici ticarət dövriyyəsi 2019-cu ilin yanvar-may ayları ilə müqayisədə azalıb. İxracın həcmi 19% düşüb. Azalma təkcə neftin ucuzlaşmasına görə deyil, həmçinin qeyri-neft ixracının azalması ilə bağlıdır. Məsələn, alüminium ixracı 5,7%, meyvə-tərəvəz ixracı 10%, şəkər ixracı 12,7%, pambıq ipliyi ixracı 18,8%, pambıq lifi icraçı 24,3%, qara metallar və ondan hazırlanan məmulatlar ixracı 42,2% azalıb.
İdxalda 28,9% eniş var. Buğda idxalı 38% geriləyib. Ancaq başqa strateji məhsulların idxalında əhəmiyyətli artım qeydə alınıb. Çay idxalı 5,2%, ət məhsulları idxalı 11,2%, süddən hazırlanmış yağların idxalı 32,5%, süd idxalı 36,2%, düyü idxalı 38,6%, əczaçılıq məhsulları idxalı 67,3% artıb”.
