Azalmalar zolağı
Dövlət Statistika Komitəsinin yeni hesabatına görə, koronavirus infeksiyasını cilovlamaq üçün tətbiq olunan məhdudiyyətlər üzündən Azərbaycana gələnlərin sayında eniş var: ötən ilin eyni ayları ilə müqayisədə gələnlərin sayı martda 2,6 dəfə, apreldə 12,1 dəfə, mayda 9,9 dəfə azalıb, bu isə ictimai iaşə xidmətlərinin həcmində düşməyə gətirib. Novator.az bildirir ki, rəsmi açıqlamaya əsasən, may ayında ictimai iaşə dövriyyəsi ötən ilin may ayı ilə müqayisədə 3,2 dəfə geriləyib. Yanvar-may ayları üzrə müqayisədə azalma 36,8 faizdir.
Əhaliyə göstərilən ödənişli xidmətlərin 2019-cu ilin yanvar-may ayları ilə müqayisədə 14,9 faiz azaldığı vurğulanır: “Beş ayda hər bir ölkə sakini orta hesabla 287,1 manatlıq və ya ötən ilin müvafiq dövrü ilə müqayisədə nominal ifadədə 49,5 manat az müxtəlif ödənişli xidmətlərdən istifadə edib”.
Başqa bir hesabata görə, 2020-ci ilin yanvar-may aylarında istehlakçılara satılmış məhsulların və göstərilmiş xidmətlərin dəyəri 2019-cu ilin eyni dövrünə nisbətən müqayisəli qiymətlərlə 5,2 faiz azalıb, bir istehlakçı orta hesabla ayda 356,9 manat və ya 2019-cu ilin eyni dövrünün göstəricisindən nominal ifadədə 11,4 manat az vəsait xərcləyib.
2019-cu ilin yanvar-may ayları ilə müqayisədə ticarət dövriyyəsi real ifadədə 1,7 faiz, o cümlədən qeyri-ərzaq malları üzrə 6,7 faiz azalıb, ərzaq məhsulları, içkilər və tütün məmulatları üzrə 3,2 faiz artıb.
Beş ayda istehlakçıların pərakəndə ticarət şəbəkəsində xərclədiyi vəsaitin 53,7 faizinin ərzaq məhsulları, içkilər və tütün məmulatlarının alınmasına sərf olunduğu bildirilir.
Dövlət Statistika Komitəsi qeyd edir ki, yanvar-may aylarında yük və sərnişin daşımaları ötən ilin eyni dövrü ilə müqayisədə müvafiq olaraq 10,3 faiz və 24 faiz azalıb, informasiya və rabitə sahəsində göstərilmiş xidmətlərin dəyəri real ifadədə 4,5 faiz artıb.
