Ermənistanın Milli Təhlükəsizlik Xidməti iyunun 14-də Çiçəklənən Ermənistan Partiyasının sədri, biznesmen Qaqik Sarukyana üç cinayət işi açıb. Novator.az-ın məlumatına görə, müxalif siyasətçi qanunsuz oyun biznesi və vergidən yayınmada; 2017-ci ilin parlament seçkisi kampaniyasında seçiciləri əla almaq üçün rüşvət verməkdə və Kotayk vilayətinin Arinc icmasında qanunsuz torpaq əldə etməkdə günahlandırılır.
Çiçəklənən Ermənistan Partiyası 132 deputatdan ibarət Ermənistan parlamentində 25 mandatla təmsil edilir. Qaqik Sarukyan da deputatdır.
2018-ci il dekabrın 9-da seçilmiş parlamentdə baş nazir Nikol Paşinyanın “Mənim addımım” blokunun (Böyük əksəriyyəti onun sədrlik etdiyi Vətəndaş Sazişi Partiyasının üzvləridir) 88, İşıqlı Ermənistan Partiyasının 17 mandatı var.
Son vaxtlar Çiçəklənən Ermənistan Partiyası Nikol Paşinyanın və hökumətinin istefası tələbləri qoyur. Tərəfdarları hesab edir ki, Qaqik Sarukyana cinayət işləri qaldırılması bununla bağlıdır. Onlar iyunun 14-ü paytaxt Yerevanda etiraz aksiyaları keçiriblər.
2017-ci il aprelin 2-də keçirilmiş parlament seçkisində Qaqik Sarukyanun bloku 105 nəfərlik qanunverici orqana 31 mandat əldə edib. Əksəriyyəti Çiçəklənən Ermənistan Partiyasının üzvləri olan bu blok 2018-ci ildə Nikol Paşinyanın hakimiyyətə gəlməsinə dəstək verib.
1975-ci il təvəllüdlü Nikol Paşinyanın Vətəndaş Sazişi Partiyası 2017-ci ilin parlament seçkisində daha iki partiya ilə birgə “Çıxış” bloku yaradıb. Blok parlamentə 9 mandat qazanıb.
2018-ci il martın 31-dən Nikol Paşinyan Ermənistanda prezident Serj Sərkisyanın baş nazir olmaq niyyətinə qarşı xalq hərəkatına başçılıq edib. Aprelin 9-da Serj Sərkisyanın prezident səlahiyyətləri başa çatıb. Həmin gün ölkə parlament idarə üsuluna keçdiyi üçün icra hakimiyyətinə rəhbərlik baş nazirə ötürülüb. Aprelin 17-də Serj Sərkisyan baş nazir kürsüsünə oturub, ancaq aprelin 23-də xalq etirazlarına tab gətirməyərək istefa verib. Mayın 8-dən baş nazir postuna Nikol Paşinyan keçib. Ermənistan hökuməti baş nazirdən, onun iki müavinindən və 12 nazirdən ibarətdir.
