Sərmayə və ÜDM incəlikləri
2020-ci ilin yanvar-may aylarında Azərbaycanda əsas kapitala 4 milyard 907,6 milyon manat, yaxud 2019-cu ilin eyni dövrü ilə müqayisədə 2,8 faiz az vəsait yönəldilib. Novator.az-ın məlumatına görə, bu rəsmi açıqlamanı yayan Dövlət Statistika Komitəsi bildirir ki, neft-qaz sektoruna yatırılmış investisiyaların həcmi 19,8 faiz artıb, qeyri neft-qaz sektoruna yönəldilən vəsaitin həcmi 16,7 faiz azalıb: “İstifadə olunmuş vəsaitin 66,9 faizi məhsul istehsalı sahələrinə, 22,7 faizi xidmət sahələrinə, 10,4 faizi yaşayış evlərinin tikintisinə gedib.
Əsas kapitala yönəldilmiş vəsaitlərin 58,9 faizi daxili vəsaitlər olub: müəssisə və təşkilatların vəsaitləri 62,1 faiz, büdcə vəsaitləri 21,4 faiz, əhalinin şəxsi vəsaitləri 6,5 faiz, bank kreditləri 5,4 faiz, büdcədənkənar dövlət fondlarının vəsaitləri 2,4 faiz, sair vəsaitlər 2,2 faiz həddində rəsmiləşib”.
Xarici ölkələr və beynəlxalq təşkilatların vəsaitləri hesabına əsas kapitala yönəldilmiş vəsaitin 88,5 faizi Böyük Britaniya, ABŞ, Türkiyə, Yaponiya, Norveç, Malayziya, İsveçrə, Rusiya və İran sərmayədarlarına məxsus olub.
Başqa bir hesabata əsasən, yanvar-may aylarında ölkədə 27 milyard 479,9 milyon manatlıq və ya əvvəlki ilin eyni dövrü ilə müqayisədə 1,7 faiz az ümumi daxili məhsul (ÜDM) istehsal edilib: “İqtisadiyyatın neft-qaz sektorunda əlavə dəyər 1,2 faiz, qeyri neft-qaz sektorunda 2,1 faiz azalıb. ÜDM istehsalının 37,7 faizi sənaye, 11,2 faizi ticarət; nəqliyyat vasitələrinin təmiri, 7,5 faizi nəqliyyat və anbar təsərrüfatı, 5,5 faizi tikinti, 4,8 faizi kənd təsərrüfatı, meşə təsərrüfatı və balıqçılıq, 2,1 faizi informasiya və rabitə, 1,7 faizi turistlərin yerləşdirilməsi və ictimai iaşə sahələrinin, 18,9 faizi digər sahələrin payına düşüb, məhsula və idxala xalis vergilər ÜDM-in 10,6 faizini təşkil edib”.
Əhalinin hər nəfərinə düşən ÜDM 2759,9 manat göstərilir.
