Media qadağası necə şərh olunur?
İyunun 14-dən 16-dək Bakı, Gəncə, Lənkəran və Sumqayıt şəhərlərinin, Abşeron, Yevlax, İsmayıllı, Kürdəmir və Salyan rayonlarının ərazisində koronavirus pandemiyasına görə sərt karantin rejimi tətbiq ediləcək. Hökumətin qərarına əsasən, bütün iş, xidmət və ticarət sahələri üzrə fəaliyyət dayandırılır, əhalinin yaşayış yerlərini və ya olduğu yerləri tərk etməsi yasaqlanır.
Qadağa televiziya və radio kanalları, kabel televiziyaları işçilərini çıxmaqla media sahəsinə də şamil olunur.
İyunun 6-dan 8-dək Bakı, Lənkəran, Sumqayıt, Gəncə şəhərlərində və Abşeron rayonunda analoji qadağa tətbiq edilib.
Novator.az-ın məlumatına görə, özünün “Facebook” səhifəsində şərh yayan media hüquqçusu Ələsgər Məmmədli qeyd edir ki, “Kütləvi informasiya vasitələri haqqında” qanunun 1-ci maddəsinə əsasən, kütləvi informasiyanın axtarılması, əldə edilməsi, hazırlanması, ötürülməsi, istehsalı və yayımı kütləvi informasiya vasitələri qanununda nəzərdə tutulan hallardan başqa məhdudlaşdırıla bilməz: “Yalnız fövqəladə və hərbi vəziyyətin qüvvədə olduğu müddət ərzində şərtləri və bu şərtlərin həyata keçirilməsi qaydası göstərilməklə kütləvi informasiya vasitələrinin azadlığının müvəqqəti məhdudlaşdırılması mümkündür. Karantin rejimi nə hərbi vəziyyətdir, nə fövqəladə vəziyyət. Nazirlər Kabineti özbaşına “televiziya və radio kanalları, kabel televiziyaları çalışa bilər, digər media orqanları yox” deyə bilməz. Bu, açıq konstitusiya pozuntusudur. Bütün media qurumlarının fəaliyyəti qanunla sərbəstdir və hüquqa hörmət göstərmək gərəkdir”.
