İstehsal, işçi və maaş hesabatı
Dövlət Statistika Komitəsi yeni hesabatlar yayıb. Novator.az bildirir ki, rəsmi açıqlamaya görə, 2020-ci ilin yanvar-may aylarında sənaye müəssisələri və fərdi sahibkarlar 15,5 milyard manatlıq və ya 2019-cu ilin ilk beş ayı ilə müqayisədə 0,4 faiz çox sənaye məhsulu istehsal edib, sənayenin qeyri neft-qaz sektorunda məhsul istehsalı 14 faiz artıb.
Sənaye məhsulunun 62 faizinin mədən sektorunda, 31,6 faizinin emal sektorunda, 5,6 faizinin elektrik enerjisi, qaz və buxar istehsalı, bölüşdürülməsi və təchizatı sektorunda, 0,8 faizinin su təchizatı, tullantıların təmizlənməsi və emalı sektorunda istehsal olunduğu vurğulanır.
Neft hasilatının 3,1 faiz azaldığı, əmtəəlik qaz hasilatının 15,5 faiz artdığı qeyd olunur.
Başqa bir hesabata əsasən, 2020-ci il mayın 1-nə ölkə iqtisadiyyatında muzdla çalışan işçilərin sayı 1 milyon 676,1 min nəfər olub, onların 926,6 min nəfəri dövlət sektorunda, 749,5 min nəfəri qeyri-dövlət sektorunda fəaliyyət göstərib: “Yanvar-aprel aylarında ölkə iqtisadiyyatında muzdla çalışan işçilərin orta aylıq nominal əməkhaqqı əvvəlki ilin müvafiq dövrünə nisbətən 26,7 faiz artaraq 736,2 manata yüksəlib”.
