Cərimələr büdcəyə yığılacaq
Nazirlər Kabineti vahid büdcə təsnifatının təsdiqi barədə qərarına dəyişiklik edib. Novator.az bildirir ki, yeniliyə əsasən, epidemiya əleyhinə rejimin, sanitariya-gigiyena və karantin rejimlərinin pozulmasına görə cərimələr büdcə gəlirlərinin təsnifatında yer alır.
Epidemiya əleyhinə rejimin, sanitariya-gigiyena və karantin rejimlərinin pozulmasına görə məsuliyyət İnzibati Xətalar Məcəlləsi ilə tənzimlənir.
Epidemiya əleyhinə rejimin, sanitariya-gigiyena və karantin rejimlərinin pozulmasına görə fiziki şəxslərə 100 manatdan 200 manatadək məbləğdə, vəzifəli şəxslərə 1500 manatdan 2000 manatadək məbləğdə cərimə, yaxud bir ayadək müddətə inzibati həbs cəzası, hüquqi şəxslərə 2000 manatdan 5000 manatadək məbləğdə cərimə nəzərdə tutur.
Epidemiya əleyhinə, sanitariya-gigiyena və karantin rejimləri dövründə tənəffüs yollarını qoruyan fərdi vasitələrdən istifadə tələblərinin pozulmasına, habelə vəzifəli şəxslərin həmin tələblərin pozulmasının qarşısını almamasına görə fiziki şəxslər 50 manat məbləğində, vəzifəli şəxslər 100 manat məbləğində, hüquqi şəxslər 200 manat məbləğində cərimələnir. Bu xətanı inzibati tənbeh almış şəxsin bir il ərzində təkrar törətməsi halında fiziki şəxslərə 100 manat məbləğində, vəzifəli şəxslərə 200 manat məbləğində, hüquqi şəxslərə 400 manat məbləğində cərimə kəsilir.
