Ağdam və Ağcabədi ziyarətləri
Dövlət başçısı, Silahlı Qüvvələrin ali baş komandanı İlham Əliyev iyunun 3-ü Ağdam rayonu ərazisində yerləşən N saylı hərbi hissədə olub. AZƏRTAC xəbər verir ki, İlham Əliyev Müdafiə Nazirliyinin rəhbərliyi ilə operativ müşavirə keçirib.
Diqqətə çatdırılıb ki, dörd hektar ərazidə salınan hərbi hissənin tikintisi yüksək keyfiyyətlə həyata keçirilib: “Qərargah binasında ideoloji otaq, brifinq, akt zalları və digər xidməti iş otaqları yerləşir. Burada 4 yataqxana binası da var. Yataqxana binalarının hamısında hərbçilər üçün hamam otaqları yaradılıb. Hamam-camaşırxana binası da bütün tələblərə tam cavab verir.
Ərazidə stomatoloq, fizioterapiya, funksional diaqnostika, prosedur otaqlarının yerləşdiyi tibb məntəqəsi qurulub. Yeməkxana binasında hərbçilərin qidalanması üçün hər cür şərait yaradılıb. Fasiləsiz elektrik enerjisi ilə təmin olunan hərbi hissədə su təminatı üçün 180 metr dərinlikdə subartezian quyusu qazılıb.
Daimi təhlükəsizliyi təmin etmək məqsədilə 24 saat xidmət göstərən qarovul evi, döyüş hazırlığı üçün təlim meydançaları olan qarovul şəhərciyi də istifadəyə tam hazırdır.
Hərbi qulluqçuların ailələri üçün 48 xidməti mənzildən ibarət ikimərtəbəli 3 yaşayış binasının tikintisinə başlanıb”.
Həmin gün prezident İlham Ağcabədi rayonuna da baş çəkib. O, Hindarx qəsəbəsində fermer Nizami Hüseynovun əkin sahəsində taxıl biçininə başlanması, Ağcabədi rayonunda dənli bitki toxumlarının emalı zavodunun istifadəyə verilməsi, “ASAN xidmət” mərkəzinin açılışı, Ağcabədi şəhərinin içməli su təchizatı və kanalizasiya sistemlərinin istismara verilməsi, “Ağcabədi-2” elektrik yarımstansiyasının yenidənqurmadan sonra istifadəyə verilməsi mərasimlərində iştirak edib.
