Borc üstünə borc?
Maliyyə Nazirliyi 1 yanvar 2020-ci ilə Azərbaycanın xarici dövlət borcunu 9 milyard 91 milyon ABŞ dolları göstərib. Bu, 2019-cu il üzrə ümumi daxili məhsulun 18,9 faizi həcmində borc deməkdir.
Novator.az-ın məlumatına görə, iqtisadçı Qubad İbadoğlu yazır ki, 2020-ci ildə ümumi dövlət borcuna xidmət xərclərinin məbləği 1 milyard 296,3 milyon ABŞ dolları olacaq: “Prezident İlham Əliyev 2019-cu ilin yekunlarına həsr olunmuş 13 yanvar müşavirəsində xarici dövlət borcunun ümumi daxili məhsulun 17 faizi ətrafında olduğunu demiş və 2020-ci ildə borcun təxminən 1 faiz azalması proqnozu vermişdi. Lakin pandemiya dövründə həm Avropa Yenidənqurma və İnkişaf Bankı, həm də Asiya İnkişaf Bankı ilə prezident arasında aparılan videokonfranslarda əsas müzakirə mövzusu kreditlər olub. İyunun 1-i Asiya İnkişaf Bankı ilə keçirilən konfransda dövlət başçısı bildirib ki, bu bankın Azərbaycana ayırdığı kredit və zəmanətlərin ümumi məbləği 3 milyard ABŞ dollarını ötür.
Müzakirələrin gedişindən görünür ki, əvvəl verilmiş bəyanatların əksinə olaraq Azərbaycan hökuməti yenidən dövlətin xarici borcunu artırmağa çalışır. Bu gedişlə ilin sonuna borcun ümumi daxili məhsulda payı 20 faizi ötə bilər.
2018-ci il avqustun 24-də Azərbaycanda dövlət borcunun idarə edilməsinə dair orta və uzun müddət üçün strategiya təsdiqlənib. Sənədə əsasən, xarici dövlət borcunun 2025-ci ildə 3,8 milyard dollaradək azalacağı gözlənirdi. İndi maliyyə naziri Samir Şərifov qeyd edir ki, hökumət xarici dövlət borcunun idarə edilməsi üzrə strategiyaya müəyyən düzəlişlərin edilməsi məcburiyyətində qalacaq, limitə yenidən baxılacaq”.
2011-ci ilə 3 milyard 857,3 milyon dollarlıq xarici borc olub.
2012-ci ilə borc 4 milyard 816,7 milyon dollara, 2013-cü ilə 5 milyard 708,4 milyon dollara yüksəlib.
2014-cü ilə borc 4 milyard 753,2 milyon manat, 2015-ci ilə 6 milyard 478,2 milyon dollar, 2016-cı ilə 6 milyard 894,3 milyon dollar, 2017-ci ilə 6 milyard 913,2 milyon dollar məbləğində rəsmiləşib.
1 yanvar 2018-ci ilə xarici dövlət borcunun məbləği 9 milyard 398,3 milyon dollar olub.
1 yanvar 2019-cu ilə xarici dövlət borcunun məbləği 8 milyard 927,1 milyon dollara düşüb.
