10 ilə 3 milyard ağac əkmək planı
Avropa İttifaqının 27 ölkəsində 2030-cu ilə qədər 3 milyard ağac əkmək nəzərdə tutulur. Novator.az-ın məlumatına görə, Avropa İttifaqının ətraf mühit, dəniz məsələləri və balıqçılıq komissarı Virqiniyus Sinkyaviçyus deyib ki, təbiəti özünə qaytarmaq planı qurumun yeni strategiyasının bir hissəsidir: “Təbiət bizim fiziki və zehni rifahımızı yüksəldir, havamızı-suyumuzu süzgəcdən keçirir, iqlimi qaydasına salır”.
Rəsmi açıqlamalara əsasən, Avropa İttifaqının icra orqanı olan Avropa Komissiyası qitənin ən azı 30 faizini qorunan sahəyə çevirməyi planlaşdırır. Qitə ərazisinin üçdə bir hissəsində insan müdaxiləsini minimuma endirməyi hədəfləyən plan üçün hər il 20 milyard dollar tələb olunur.
Bu planın mahiyyəti intensiv əkinçilik rejimindən təbiəti mühafizə rejiminə keçməkdir. Amma detalların 2021-ci ildə açıqlanması gözlənir.
1957-ci ildə yaradılmış Avropa İttifaqının 27 üzvü var: Almaniya, Avstriya, Belçika, Bolqarıstan, Çexiya, Danimarka, Estoniya, Finlandiya, Fransa, Xorvatiya, İrlandiya, İspaniya, İsveç, İtaliya, Kipr, Latviya, Litva, Lüksemburq, Macarıstan, Malta, Niderland, Polşa, Portuqaliya, Rumıniya, Slovakiya, Sloveniya, Yunanıstan.
İlkin Nizami
