Gələcəyin yanacağı – dəniz yosunu
Alimlər dəniz yosunundan alınan yanacağı yeni üsulla sınaqdan keçiriblər. Avtomobil yanacağına – benzinə 10% həcmində dəniz yosunu yanacağı əlavə olunub.
Təcrübə göstərib ki, yosun yanacağının havaya buraxdığı zərərli maddələrin miqdarı digər yanacaqlarla müqayisədə eynidir. Lakin neftdən alınan yanacaqlardan fərqli olaraq yosun yanacağının buraxdığı karbon qazı atmosferə qarışmır.
Novator.az xəbər verir ki, alimlər yosunu üçüncü nəsil bioyanacaq adlandırırlar. Digər bioyanacaqlar kənd təsərrüfatı qalıqlarından hazırlanır. Bu baxımdan alimlər alternativ enerji kimi yosun yanacağını daha əlverişli sayırlar. Çünki yosun hər yerdə bitir, onu becərməyə ehtiyac yoxdur. Yosunun yalnız günəşə və dənizə ehtiyacı var, planetin isə 70%-i dənizlərdən, okeanlardan ibarətdir.
Tədqiqatçılar ümid edir ki, dəniz yosunu dünyada yanacaq istehsalına çəkilən xərcləri xeyli azalda bilər.
Hazırda bir litrlik dəniz yosunu yanacağı ənənəvi yanacaqlardan qat-qat bahadır. Lakin yosundan yanacaq alınması prosesi genişləndikcə qiymət düşəcək. Alimlər hesab edirlər ki, bu texnologiyanın geniş tətbiqi təxminən 25 ilə mümkün olacaq.
İlkin Nizami
